ހިޔާ ޓަވަރެއްގައި ރޯވުން: 37 މީހަކަށް ވަގުތީ ބޯހިޔާވަހިކަން ދީފި

ރާއްޖޭގެ އެންމެ ބޮޑު އާބާދީއެއް ދިރިއުޅޭ ހުޅުމާލެ ހިޔާ ފްލެޓުތަކުގެ ޓަވަރެއްގައި ރޯވި ހާދިސާއާ ގުޅިގެން 37 މީހަކަށް ވަގުތީ ބޯހިޔާވަހޮކަން ދީފި އެވެ.

ރޭގައި އަލިފާން ރޯވެފައިވަނީ ހިޔާގެ ފަސްވަނަ ޓަވަރުގަ އެވެ. ރޯވެފައި ވަނީ އައުޓްޑޯ ޔުނިޓެއްގައި ކަމަށް މައުލޫމާތު ލިބެ އެވެ. ނަމަވެސް އެއްވެސް ރަސްމީ އިދާރާއަކުން އެކަން ކަށަވަރެއް ނުކޮށްދެ އެވެ.

ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން މިއަދު ބުނީ ހިޔާ ޓަވަރު ފަހެއްގައި ރޭގައި ހިނގި އަލިފާނުގެ ހާދިސާއާއި ގުޅިގެން އެ ޓަވަރުގެ ހަތް އެޕާޓްމަންޓެއްގެ 37 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ.

މި ހާދިސާގައި އެ ޓަވަރުގެ މައި ހޮޅިއަށް ގެއްލުން ލިބި، ބައެއް އެޕާޓްމެންޓްގެ ފާހާނާ ބޭނުން ކުރުމަށް ވަނީ ބުރޫ އަރައިފަ އެވެ. އެންޑީއެމްއޭއިން ބުނީ މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީން ކުރަމުންދާ ކަމަށެވެ.

މި އަލިފާނުގެ ހާދިސާއާއި ގުޅިގެން އިތުރަށް ބަލަން ޖެހޭ ކަންކަން އެޗްޑީސީ އާއި ގުޅިގެން ބަލަމުންދާ ކަމަށްވެސް އެ އޮތޯރިޓީން ބުންޏެވެ.

"މި ހާދިސާއާއި ގުޅިގެން އެހީތެރިކަމެއް ބޭނުންވާ ނަމަ އެންޑީއެމްއޭގެ އެމެޖެންސީ ހޮޓްލައިން 115 އަށް ގުޅުއްވުން އެދެން،"