ގިރާވަރުފަޅު ޕްލޭނަށް ގެނައި ބަދަލާއެކު މިއަދު ގުރު ނެގުން ކުރިޔަށް

ގިރާވަރުފަޅުގެ ލޭންޑް ޔޫސް ޕްލޭން ބަދަލުކޮށް، އާ ލޭންޑް ޔޫސް ޕްލޭނާ އެއްގޮތަށް ގިރާވަރުފަޅުން ގޯތި ލިބުނު މީހުންގެ މެދުގައި ގުރުއަތު ނަގަން ފަށައިފި އެވެ.

ހައުސިން މިނިސްޓްރީން ކުރިން ބުނެފައި ވަނީ، ކުރިން ހަދާފައިވާ ގިރާވަރުފަޅުގެ ލޭންޑް ޔޫސް ޕްލޭންގައި 610 ގޯތި މަދުވާތީ، އާ ލޭންޑް ޔޫސް ޕްލޭނެއް ތައްޔާރުކޮށްފައިވާ ކަމަށެވެ. އާ ޕްލޭނާއެކު އެފަޅުން 4،072 ގޯތި ދޫކުރާނެ އެވެ.

އެ ބަދަލާއެކު، ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އައިސް، އާ ލޮޓް ނަންބަރު ވަނީ ކަނޑައަޅާފަ އެވެ.

އެހެންކަމުން، އާ ޕްލޮޓްތަކުގެ ގުރު ނެގުން މިއަދު 9:30 އިން ފެށިގެން ސޯޝަލް ސެންޓަރުގައި ކުރިއަށް އެބަދެ އެވެ.

މިނިސްޓްރީން ބުނީ ގިރާވަރުފަޅުން ގޯތި ލިބިފައިވާ ފަރާތްތަކުގެ ގުރު ނަގަމުންދާ ވަރަކުން، އެކަމަށް ގާއިމްކޮށްފައިވާ ހާއްސަލަ ލިންކް މެދުވެރިކޮށް ބަލައިލެވޭނެ ކަމަށެވެ. އެ ލިންކުން ދައްކާ ގޮތުގައި މިހާތަނަށް 2050 އަކަފޫޓުގެ ގޯތި ލިބުނު 42 މީހަކު ވަނީ ގުރު ނަގާފަ އެވެ.