ރަލާއި އޫރުމަސް ނުވިއްކާ ރިސޯޓެއް ހަދަން ތ. މާގުޅި ދިވެހި ކުންފުންޏަކަށް

ތ. މާގުޅީގައި ރަލާއި އޫރުމަސް ނުވިއްކާ "ހަލާލް ކޮންސެޕްޓު" ގެ ރިސޯޓެއް ހަދަން އެކޯޑް އިންޝުއަރަންސް ބްރޯކާސް ކުންފުނިން ރަށެއް ނަގައިފި އެވެ. 

ސަރުކާރުން ހަލާލް ޓޫރިޒަމް ތަރައްގީ ކުރަން އެންމެފަހުން ބިޑްކުރި ފަސް ރަށުގެ ތެރެއިން ރާއްޖޭގައި އިންޝުއަރެންސް ބްރޯކަރެއްގެ ގޮތުގައި ހަރަކާތްތެރިވާ ތަޖުރިބާކާރު ކުންފުންޏެއް ކަމަށްވާ އެކޯޑް އިންޝުއަރަންސް ބްރޯކާސް މޯލްޑިވްސް ޕްރައިވެޓް ލިމިޓެޑުން ނަގާފައިވަނީ ތ. މާގުޅި އެވެ. 

ރާއްޖޭގައި ހަލާލް ޓޫރިޒަމް ތަރައްގީ ކުރަން އިސްކަން ދީގެން ސަރުކާރުން މި ރަށްތައް އިއުލާނުކުރީ ހާއްސަ އިސްކަމެއް ދީގެންވެ،. ޓޫރިޒަމް މިނިސްޓްރީން މި ރަށް ބިޑަށް ހުޅުވާލީ މިދިޔަ އަހަރުގެ 29 ޖޫންގަ އެވެ. މި ރަށަށް އިއުލާނުކުރި އަަގަކީ 189،000 ޑޮލަރު (2.9 މިލިއަން ރުފިޔާ) އެވެ. މި ރަށަކީ ޓޫރިޒަމް މިނިސްޓްރީން ހަލާލު ޓޫރިޒަމް ތަރައްގީ ކުރަން ހުޅުވާލި އެންމެ ކުޑަ ލީޒް އެކުއިޒިޝަން ކޮސްޓެއް ކަނޑައެޅި ރަށެވެ. މިއީ  ގާތްގަނޑަށް 3.5 ހެކްޓަރުގެ ރަށެވެ. 

ތ. މާގުޅި ބިޑުކޮށްގެން ނެގި އެކޯޑް އިންޝުއަރަންސް ބްރޯކާސް މޯލްޑިވްސް ޕްރައިވެޓް ލިމިޓެޑަކީ ރާއްޖޭގެ އިންޝުއަރަންސް ބްރޯކަރެއްގެ ގޮތުގައި މަސައްކަތްކުރާ އެންމެ ތަޖުރިބާކާރު އަދި ދުވަސްވީ އެއް ކުންފުންޏެވެ. މި ކުންފުނިން 2002 ވަނަ އަހަރުން ފެށިގެން ދަނީ މި ވިޔަފާރީގައި ހަރަކާތްތެރިވަމުންނެވެ. މި ކުންފުންޏަކީ ދުނިޔޭގެ އެކި ފަރާތްތަކަށް އިންޝުއަރެންސް ވިއްކާ ބޮޑު ކުންފުންޏެކެވެ. އަދި މިއީ ދުނިޔޭގެ އެންމެ ބޮޑު އިންޝުއަރަންސް ބްރޯކަރު ކަމަށްވާ "މާޝް" ގެ ރާއްޖޭގެ އެކްސްކްލޫސިވް ކޮރެސްޕޮންޑެންޓެވެ. މީގެ އިތުރުން ރާއްޖޭގެ ބޮޑެތި ރިސޯޓްތަކާއި ބައިނަލްއަގުވާމީ ހޮޓެލް ޗެއިންތައް ކަމަށްވާ މެރިއަޓް އާއި ހިލްޓަން ފަދަ ތަންތަނުގެ އިންޝުއަރަންސް ކަންކަން މި ކުންފުނިން ބަލަހައްޓައެވެ. އަދި ހައި-އެންޑް ރިސޯޓްތަކުގެ އިންޝުއަރަންސް މެނޭޖްކުރުމާއި ރިސްކް އެސެސްމަންޓް ހެދުމުގައި މި ކުންފުންޏަކީ ވަރަށް ބޮޑު އިތުބާރެއް ހޯދާފައިވާ ބަޔެކެވެ. މި ކުންފުނީގެ އެމްޑީ އަހުމަދު އިނާޒު އެވެ. އަދި ހިއްސާދާރުންގެ ގޮތުގައި ތިއްބަވަނީ އިބްރާހިމް ޖަމީލު އާއި އާސިމާ ތައުފީގު އަދި ހުސެއިން ވަހީދު އާއި އައިޝަތު ވަހީދާ އެވެ. 

ސަރުކާރުން ހަލާލް ޓޫރިޒަމް ތަރައްގީ ކުރަން ހއ އާއި ހދ އަދި ށގެ އިތުރުން ތ އަދި ލ އަތޮޅުގެ ފަސް ރަށެއް ހުޅުވާލި އެވެ. މި ރަށްތަކުން ޖުމްލަ 500 އެނދު ބާޒާރަށް ނެރޭނެ ކަމަށް އަންދާޒާކުރި އެވެ. 

ތަފާސް ހިސާބުތައް ދައްކާ ގޮތުން 2024 ވަނަ އަހަރު ހަލާލް ޓޫރިޒަމް މާކެޓްގެ އަގު ހުރީ 255 ބިލިއަން އާއި 300 ބިލިއަން އެމެރިކާ ޑޮލަރާ ދެމެދުގަ އެވެ. އަދި ކުރިމަގުގެ ދާއިރާ އަހަރަކު ގާތްގަނޑަކަށް %5 އާއި %9 އާ ދެމެދު ކުރިއަރަމުންދާނެ ކަމަށް ބެލެވެއެވެ. އެގޮތުން "މާސްޓަރކާޑް-ކްރެސެންޓް ރޭޓިން" ގެ ރިޕޯޓްތައް ބުނާގޮތުން 2030 ވަނަ އަހަރު އަންނައިރު މުސްލިމް ފަތުރުވެރިން ކުރާ ހޭދަ 230 ބިލިއަން ޑޮލަރަށް ވުރެ މައްޗަށް އަރާނެ އެވެ. ހަލާލް ޓޫރިޒަމްގައި އެންމެ ކުރިއަރާފައިވާ މާކެޓް ތަކަކީ އިންޑޮނޭޝިއާ، މެލޭޝިއާ، ތުރުކީ، ސައުދީ އަރަބިއްޔާ އަދި ޔޫ.އޭ.އީ އެވެ. އަދި އިސްލާމީ ނޫން ގައުމުތަކުގައި މިހާރު މި ކޮންސެޕްޓް ދަނީ ކުރިއަރަމުންނެވެ. މިގޮތުން ސިންގަޕޫރު އާއި ތައިލެންޑް އަދި ޖަޕާން އަދި އިނގިރޭސިވިލާތުގައި ވެސް މި ވިޔަފާރި ވަނީ ފުޅާވެފަ އެވެ.