ދެކުނުގެ 4 އަތޮޅު ވައިގެ މަގުން ގުޅާލައިފި

ގައުމީ އެއާލައިން، މޯލްޑިވިއަނުން ރާއްޖޭގެ ދެކުނުގެ ހަތަރު އަތޮޅު ވައިގެ ދަތުރުފަތުރުގެ ނިޒާމުން ގުޅާލައިފި އެވެ.

އަންނަ މަހުގެ އެއްވަނަ ދުވަހުން ފެށިގެން މޯލްޑިވިއަންގެ ޝެޑިއުލް ދަތުރުތަކުން ގުޅާލަނީ އެންމެ ދެކުނުގައި އޮންނަ ހަތަރު އަތޮޅު ކަމަށްވާ އައްޑޫ ސިޓީ، ފުވައްމުލަކު ސިޓީ، ގއ.އަތޮޅު އަދި ގދ. އަތޮޅެވެ.

މި ދަތުރުތައް ކުރާނީ ރާއްޖޭގައި މިހާރު ވެސް ފުޅާ ދާއިރާއެއްގައި ސީޕްލޭން ހިދުމަތް ދިނުމަށް ބޭނުންކުރާ "ޓްވިން އޮޓާ" މަރުކާގެ ކުޑަ މަތިންދާބޯޓުގަ އެވެ. މި މަތިންދާބޯޓުތަކުގައި ފުރޮޅު ހަރުކޮށް، އެއާޕޯޓްގައި އޮޕަރޭޓް ކުރެވޭ ގޮތަށް ވަނީ ތައްޔާރުކޮށްފަ އެވެ.

ދެކުނުގައި މި ހިދުމަތް ފެށުމުގެ ގޮތުން މިއަދު ވަނީ ގަން އިންޓަނޭޝަނަލް އެއާޕޯޓުގައި ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތު ޝަރަފުވެރިކޮށްދެއްވީ، ޓްރާންސްޕޯޓް މިނިސްޓަރު މުހައްމަދު އަމީން އެވެ. މި ރަސްމިއްޔާތުގައި ކެބިނެޓުގެ ވަޒީރުންނާއި މޯލްޑިވިއަންގެ އިސްބޭފުޅުން ވެސްވަނީ ބައިވެރިވެވަޑައިގެންފަ އެވެ.

މި ރަސްމިއްޔާތުގައި ވާހަކަ ދައްކަވަމުން އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ، މި އޮޕަރޭޝަންގެ ބޭސްއަކީ ގަން އިންޓަނޭޝަނަލް އެއާޕޯޓް ކަމަށެވެ. އަދި މިއީ އައިލެންޑު އޭވިއޭޝަންގެ ތާރީހުގައި ވެލާނާ އިންޓަނޭޝަނަލް އެއާޕޯޓު ފިޔަވައި އިތުރު އޮޕަރޭޝަން ބޭސްއެއްގެ ގޮތުގައި ކަނޑައެޅި ފުރަތަމަ އެއާޕޯޓްކަން ވެސް އޭނާ ފާހަގަކުރައްވާފައިވެ އެވެ.

މޯލްޑިވިއަން އިން މި ދަތުރުތަކުގެ އަގުތައް އިއުލާނުކޮށްފައިވާއިރު އެންމެ އަގު ބޮޑުކޮށް އޮތީ ގަމާއި ކޫއްޑުއާ ދެމެދު ކުރާ ދަތުރުތަކެވެ. މީއީ މި ހަތަރު އަތޮޅުތަކުގައި ކުރާ އެންމެ ދިގު ރާސްތާ ހިމެނޭ ދަތުރެވެ. މިއީ ގާތްގަނޑަކަށް 200 ކިލޯމީޓަރުގެ ރާސްތާ އެވެ. މި ދަތުރުގެ ދިގުމިނަކީ ގާތްގަނޑަކަށް އެއް ގަޑިއިރެވެ. އެހެންވެ ކޮޅަކަށް އިއުލާނުކޮށްފައިވާ 900ރ. އަކީ ހެޔޮ އަގެއްގެ ގޮތުގައި ބުނެވިދާނެ އެވެ. ސަބަބަކީ ސީޕްލޭންގެ ދަތުރުތައް މި ރޭންޖުގައި އާއްމުކޮށް އުޅެނީ 250 ޑޮލަރަށްވުރެ މަތީގެ އަގު ތަކެއްގައި ކަމަށްވުމެވެ.