ބީއެމްއެލްއިން ތިލަފުށީގައި އޭޓީއެމްގެ ހިދުމަތް ފަށައިފި

ބޭންކް އޮފް މޯލްޑިވްސް (ބީއެމްއެލް) އިން ސިނާއީ މަސައްކަތް ކުރާ ކ. ތިލަފުށީގައި އޭޓީއެމްގެ ހިދުމަތް ފަށައިފި އެވެ.

ބީއެމްއެލްއިން ބުނީ ތިލަފުށީގައި ސެލްފް-ސާވިސް ބޭންކިން އޭޓީއެމް ހިދުމަތް ގާއިމުކޮށް، މުޅި ރާއްޖޭގައި ގާއިމުކޮށްފައިވާ އޭޓީއެމް ވިއުގަ އިތުރަށް ހަރުދަނާ ކޮށްފައިވާ ކަމަށެވެ.

ތިލަފުށީގައި އޭޓީއެމް ހުޅުވުމަށް ބޭއްވި ރަސްމިއްޔާތުގައި، އިކޮނޮމިކް މިނިސްޓަރު މުޙައްމަދު ސައީދާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފާއި ބޭންކުގެ އިސް އޮފިޝަލުން ވަނީ ބައިވެރިވެވަޑައިގެންފަ އެވެ.

ބީއެމްއެލް އިން ބުނީ، މި އަހަރު އިތުރު ސެލްފް-ސާވިސް ބޭންކިން ސެންޓަރުތަކާއި ބްރާންޗުތައް އަދި އޭޓީއެމްތައް ގާއިމުކޮށް، އެ ބޭންކުގެ ހިދުމަތް އިތުރަށް ފުޅާކުރާނެ ކަމަށެވެ. އަދި 70 އަށްވުރެ ގިނަ ޑޮލަރު އޭޓީއެމް ބެހެއްޓުން އޭގެ ތެރޭގައި ހިމެނޭ ކަމަށެވެ.

ބީއެމްއެލްގެ ސީއީއޯ ޝަރީފު ވިދާޅުވީ، ރާއްޖޭގެ އެކި ކަންކޮޅުތަކުގައި ބޭންކުގެ ހިދުމަތްތައް އިތުރަށް ހަރުދަނާ ކުރަމުން އަންނައިރު، އޭޓީއެމް ވިއުގަ އިތުރަށް ފުޅާކުރުމަކީ އެ ބޭންކުގެ ވަރަށް ބޮޑު އަމާޒެއް ކަމަށެވެ.

"ތިލަފުށީގައި ގާއިމުކުރެވުނު ސެލްފް-ސާވިސް އޭޓީއެމްއިން ދައްކުވައިދެނީ ވިޔަފާރި މުޖުތަމައުތަކަށް ބޭންކިން ހިދުމަތްތައް އިތުރަށް ފަސޭހަކޮށްދިނުމަށް އަޅުގަނޑުމެން ދޭ އަހުމިއްޔަތުކަން،" އޭނާ ވިދާޅުވި އެވެ.