ގިރާވަރުފަޅުން ގޯތި ލިބުނު މީހުންނަށް އުފާ، އަލުން ހިއްކަން ފެށިއްޖެ
ގިރާވަރުފަޅުން ދޫކުރަނީ ޖުމްލަ 4،072 ގޯއްޗެވެ. އަދި މި ގޯތިތަކުގެ ގުރުއަތު ނެގުން މާދަމާ ފަށާނެ އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުގައި ގިރާވަރުފަޅު ހިއްކަން ފެށި އެވެ، ނަމަވެސް އެކަން ފުރިހަމައެއް ނުވިއެވެ، އެ ވެރިކަން ނިމުނީ އެވެ. ވެރިކަން ނިމުނުއިރު ބިން ހިއްކުމުގެ އެއްބަސްވުންތައް ހުރި ގޮތުން ރައީސް ޑރ. މުހައްމަދު މުއިއްޒުއަށް ޖެހުނީ އެ އެއްބަސްވުންތައް އަލުން ބަދަލު ކުރާށެވެ. އެއްބަސްވުންތައް ބަދަލު ކުރުމަށްފަހު އަލުން މިއަދު އަނެއްކާވެސް މި ވަނީ ގިރާވަރު ފަޅުގެ ބިން ހިއްކަން ފެށިފަ އެވެ.
ރައީސް ޑރ. މުއިއްޒު އެކްސްގައި ވިދާޅުވެފައިވާ ގޮތުގައި މިއަދު ހެނދުނު ގިރާވަރުފަޅު ހިއްކުމުގެ މަސައްކަތް ވަނީ އަލުން ފަށާފަ އެވެ.
ގިރާވަރުފަޅުން ޖުމްލަ 160 ހެކްޓަރު ހިއްކަން ޖެހެ އެވެ. މި ފަޅުގެ 50 ނުވަތަ 54 ހެކްޓަރު ވަނީ ހިއްކާ ނިންމާފަ އެވެ. އަލުން ބިން ހިއްކުމުގެ މަސައްކަތް ކުރަނީ ހޮލެންޑުގެ ބޮސްކާލިސް ޖޮއިންޓު ވެންޗާ ކުންފުންޏާ ކުންފުންޏަކުންނެވެ.
"ބިންވެރިޔާ ސްކީމު" ގެ ދަށުން ގިރާވަރުފަޅުން ޖުމްލަ 5,433 ގޯތިދޭން ކުރިން ނިންމި އެވެ. ނަމަވެސް މިތަނުގެ ބައެއް ގޯތިތައް ވަނީ ގުޅީފަޅަށް ބަދަލުކޮށްފަ އެވެ. މިހާރު ދޫކުރަނީ ޖުމްލަ 4،072 ގޯއްޗެވެ. އަދި މި ގޯތިތަކުގެ ގުރުއަތު ނެގުން މާދަމާ ފަށާނެ އެވެ.
ގިރާވަރުފަޅުން ދޫކުރާ ގޯތިތައް
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓޫގެ 254 ގޯތި
- 2450 އަކަފޫޓުގެ 1 ގޯތި
މި ސަރުކާރުން ވަނީ ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުތަކެއް ގެނެސްފަ އެވެ. މި ބަދަލާއެކު އެ ސިޓީއަކީ ހިތްފަސޭހަ ތަނެއްގެ ގޮތުގައި ބޭއްވުމަށް ގިނަ ބަދަލުތަކެއް ގެނެސްފައިވެ އެވެ.
ކޮމެންޓް
Republic of Maldives