މޯލްޑިވްސް މެރިޓައިމް ކޮންފަރެންސުގެ ޕާޓްނަރުންނާއެކު ސޮއިކޮށްފި

މި އަހަރު ބޭއްވުމަށް ހަމަޖެހިފައިވާ "މޯލްޑިވްސް މެރިޓައިމް ކޮންފަރެންސް" ގެ އިތުރު ކޮންފަރެންސް ޕާޓްނަރުންނާއެކު މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން މިއަދު އެއްބަސްވުމެއްގައި ސޮއިކޮށްފިއެވެ.

އެމްޕީއެލްގެ ހެޑް އޮފީހުގައި މިއަދު މެންދުރު ބޭއްވި ރަސްމިއްޔާތެއްގައި "މޯލްޑިވްސް މެރިޓައިމް ކޮންފަރެންސް"ގެ ހަތަރު ޕާޓްނަރުންނާއެކު ވަނީ އެއްބަސްވުމުގައި ސޮއިކޮށްފަ އެވެ. 

މި ރަސްމިއްޔާތުގައި އެމްޕީއެލްގެ ފަރާތުން ސޮއިކުރެއްވީ ކުންފުނީގެ ސީއީއޯ ޑީސީޕީ (ރިޓަޔަޑް) މުޙައްމަދު ރިޝްވާނެވެ. ލޮޖިސްޓިކްސް ޕާޓްނާ އެމްއެސްއެސްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަޙްމަދު ޝަރީފެވެ. ބްރޯޑްކާސްޓިންގ ޕާޓްނާ ޕީއެސްއެމްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަޙްމަދު ޝަކީބެވެ. 

ހޯސްޓިން ޕާޓްނަރު ވިލާ ޝިޕިންގ އެންޑް ޓްރޭޑިން އެންޑް ޓްރޭޑިންގ ކޮމްޕެނީގެ ފަރާތުން ޗީފް އޮޕަރޭޝަނަލް އޮފިސަރު މުއާވިޔަތު އުމަރު ސޮއިކުރެއްވިއިރު، މެގަޒިން ޕާޓްނަރު އެމްއެމްޖޭގެ ފަރާތުން ސޮއިކުރެއްވީ ކެޕްޓަން މުޙައްމަދު ނާޒިމެވެ.

މި އަހަރުގެ "މޯލްޑިވްސް މެރިޓައިމް ކޮންފަރެންސް" ބޭއްވުމަށް ހަމަޖެހިފައިވަނީ މި އަހަރުގެ އޭޕްރީލް މަހުގެ 15 ވަނަ ދުވަހު އެވެ. މިއީ "މޯލްޑިވްސް މެރިޓައިމް ކޮންފަރެންސް"ގެ ދެވަނަ އެޑިޝަނެވެ. 

މި ކޮންފަރެންސް އެންމެ ފުރަތަމަ އެމްޕީއެލް އިން ބޭއްވީ 2024 ވަަނަ އަހަރެވެ. މި ކޮންފަރެންސަކީ މެރިޓައިމް ދާއިރާގެ ބައިނަލްއަޤްވާމީ ތަޖުރިބާކާރުންނާއި ސްޓޭކްހޯލްޑަރުންނާއި ދާއިރާއާ ގުޅުންހުރި ފަރާތްތައް ބައްދަލުކޮށް، ދާއިރާގެ ކުރިއެރުމާއި ގުޅޭ ގޮތުން މަޝްވަރާކޮށް ޚިޔާލު ބަދަލުކުރުމުގެ ގޮތުން ބާއްވާ ބައިނަލްއަޤްވާމީ ކޮންފަރެންސެކެވެ. މީގެ އިތުރުން މި ކޮންފަރެންސްގެ ޕާޓްނަރުންގެ ގޮތުގައި މޯލްޑިވްސް ކޯސްޓް ގާޑް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، ޔުނައިޓަޑް ނޭޝަންސް ކޮންފަރެންސް އޮން ޓްރޭޑް އެންޑް ޑިވަލޮޕްމަންޓް (އަންކްޓަޑް)، އިންޓަރނޭޝަނަލް އެސޯސިއޭޝަން އޮފް ޕޯޓްސް އެންޑް ހާރބަސް، ސެކިއުރިޓީ އެންޑް ސޭފްޓީ ޕާޓްނަރުގެ ގޮތުގައި މޯލްޑިވްސް ޕޮލިސް ސާރވިސަސް އަދި އެކެޑަމިކް ޕާޓްނަރުގެ ގޮތުގައި މޯލްޑިވްސް ނޭޝަނަލް ޔުނިވާރސިޓީ ވަނީ މީގެ ކުރިން ހަމަޖައްސައިފައެވެ.