ވިހަފަރުގައި އެއާޕޯޓް އަޅަން ބިން ހިއްކަން ފަށައިފި

ނ. ވިހަފަރުގައި އެއާޕޯޓު ތަރައްގީކުރަން ބޭނުންވާ ބިން ހިއްކުމުގެ މަސައްކަތް މިއަދު ފަށައިފި އެވެ.

އެއަތޮޅު ވެލިދޫ ކައިރީ އޮންނަ ވިހަފަރު ފިނޮޅުގައި މިއަދު ވަނީ ބިން ހިއްކުމުގެ މަސައްކަތް ރަސްމީކޮށް އިފްތިތާހުކޮށްފަ އެވެ. 

ރައީސް ޑރ. މުހައްމަދު މުއިއްޒު ބައިވެރިވެވަޑައިގަތް އެ ރަސްމިއްޔާތުގައި ބިން ހިއްކުމުގެ އަމަލީ މަސައްކަތް ފައްޓަވައިދެއްވީ އިކޮނޮމިކް މިނިސްޓަރު މުހައްމަދު ސައީދު އަދި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. 

އެއާޕޯޓު އެޅުމަށް ވިހަފަރު ފަޅުން 42 ހެކްޓަރުގެ ބިން ހިއްކާނެ އެވެ. އެތަން ހިއްކާނީ 1.6 މީޓަރުގެ އުސްމިނުގަ އެވެ.

ވިހަފަރުގައި އެއާޕޯޓެއް ތަރައްގީކުރަން ރައީސްގެ ގަރާރަކުން ކަނޑައަޅުއްވައި އިއުލާންކުރެއްވީ މާޗު، 2024 ގަ އެވެ. އަދި މިއަހަރުގެ ކުރީކޮޅު އެ މަސައްކަތް ފައްޓަވާނެ ކަމަށް މިދިޔަ އަހަރުގެ ޖުލައި މަހު ނ. އަތޮޅަށް ކުރެއްވި ދަތުރުފުޅުގެ ތެރެއިން ރައީސް ވިދާޅުވެފައިވެ އެވެ.

ރައީސް ވިދާޅުވެފައި ވަނީ އެ އަތޮޅު މާފަރުގައި އެއާޕޯޓެއް އޮތްކަމުގައި ވިޔަސް، ހޮޅުދޫ އާއި ވެލިދޫ އަދި ފޮއްދޫ ހިމެނޭ ސަރަހައްދުގައި އިތުރު އެއާޕޯޓެއް އޮތުން މުހިންމުކަމަށް ދެކެވަޑައިގަންނަވާ ކަމަށެވެ.

ވަކިން ހާއްސަކޮށް، ޓޫރިޒަމް ކުރިއަރަމުންދާ އަތޮޅެއްގެ ކަމުންނާއި، އިގްތިސޯދު ސިންދަފާތުކުރުމުގެ ބޮޑެތި މަޝްރޫއުތައް ހިނގާނޭ އަތޮޅެއް ކަމަށްވާތީ، އެ އެއާޕޯޓް އޮތުމުން ދުރު ރާސްތާގައި ލުއިފަސޭހަވުމާއި ފައިދާ ލިބޭނޭކަމަށް ރައީސް ވިދާޅުވެފައިވެ އެވެ.

ވިހަފަރަކީ ވެލިދޫއާ ކައިރީގައި އޮންނަ ފިނޮޅެކެވެ. އެތަނަކީ ދައުލަތުގެ އާންމު މަންފާއެއް ހާސިލުކުރަން ބޭނުންވާ އިގުތިސޯދީ ސިޔާސަތެއްގެ ދަށުން ހިންގޭނެ މުހިންމު މަޝްރޫއުތަކުގެ ތެރެއިން އެއާޕޯޓު އަޅަން ރާވާފައިވާ ނުވަ ތަނުގެ ތެރެއިން ފަޅެކެވެ.

ވިހަފަރުގައި އެއާޕޯޓެއް އަޅައިދެއްވާނެ ކަމަށް ރައީސް އެންމެ ފުރަތަމަ އިއުލާނު ކުރައްވާފައި ވަނީ ރިޔާސީ ކެމްޕޭނު ތެރޭގައި ވެލިދޫގައި ވާހަކަ ދައްކަވަމުންނެވެ.