ސަސްޓެއިނަބަލް ޓައުންޝިޕް "ޕްރޮޖެކްޓް އައިލާ"ގެ އަމަލީ މަސައްކަތް ފަށައިފި

"ޕްރޮޖެކްޓް އައިލާ" ގެ ނަމުގައި ރާއްޖޭގެ ފުރަތަމަ "ސަސްޓެއިނަބަލް ޓައުންޝިޕް"ގެ އަމަލީ މަސައްކަތް މިއަދު ރަސްމީކޮށް ފަށައިފި އެވެ. 

"ޕްރޮޖެކްޓް އައިލާ" ގެ ނަމުގައި އެސްއީޒެޑް ގާނޫނުގެ ދަށުން "ސަސްޓެއިނަބަލް ޓައުންޝިޕް" އެއްގެ ގޮތުގައި އެސްއީޒެޑެއް ތަރައްގީކުރުމަށް ޓަކައި ކްރިސްޓަލް ހޯލްޑިން ޕްރައިވެޓް ލިމިޓެޑާ ހަވާލުކޮށްފައިވާ މަޝްރޫއުގެ އަމަލީ މަސައްކަތް މިއަދު ފައްޓަވައި ދެއްވީ ރައީސް ޑރ. މުހައްމަދު މުއިއްޒު އެވެ. 

ނ. އަތޮޅުގައި އެ މަޝްރޫއު ކުރިއަށް ގެންދިއުމަށް ހަވާލުކޮށްފައިވާއިރު، މި މަޝްރޫއު ކުރިއަށްގެންދާނީ އެ އަތޮޅުގެ ދިގުފަރު ފަޅާއި ދެކުނުފަރު އަދި ކުރަމާދޫގަ އެވެ.

މިއަދުގެ ރަސްމިއްޔާތުގައި ކްރިސްޓަލް ހޯލްޑިންސްގެ ސީއީއޯ ޕެޓާ ކާސްޓިކް ވިދާޅުވީ އައިލާ މޯލްޑިވްސްއާ އެކު، ރާއްޖޭގައި އިންވެސްޓްމެންޓްގެ އާ ޒަމާނެއް ގެނެސްދޭނެ ކަމަށް ގަބޫލު ކުރައްވާ ކަމަށެވެ. 

ސަރުކާރުން ކަނޑައަޅާފައިވާ ތާރީހާ އެއްގޮތަށް، 2028 ވަނަ އަހަރު ނިމުމުގެ ކުރިން ނިންމުމަށެވެ. 

މި ސަސްޓެއިނަބުލް ޓައުންޝިޕްގައި ޓޫރިސްޓުންނަށް ހިދުމަތްދޭ ލަގްޒަރީ ހޮސްޕިޓާލިޓީ އާއެކު، އިގުތިސާދީ އިޖުތިމާއީ އެހެން ދާއިރާތަކަށް ހާއްސަ ވަސީލަތްތައް ވެސް ގާއިމްކުރާނެ އެވެ. 

އޭގެ ތެރޭގައި ރަނގަޅު ފެންވަރުގެ ސިއްހީ ހިދުމަތާއި ޓޫރިޒަމަށް މީހުން ތަމްރީނުކުރާ މަރުކަޒަކާއި ޒަމާނީ ފެންވަރަށް ދަނޑުވެރި ކަމާއި އެކުއާ ކަލްޗާގެ މަސައްކަތް ކުރާ ނިޒާމުތައް ހިމެނޭނެ އެވެ. 

އަދި ދަނޑުވެރިކަމާއި އެކުއާކަލްޗާގެ މަސައްކަތް އެ ތަނުގައި ކުރާނީ ރާއްޖޭގެ ކާބޯތަކެތީގެ ރައްކާތެރިކަމަށް އަމާޒު ކޮށްގެންނެވެ.

ގާތްގަނޑަކަށް 790 މިލިޔަން ޑޮލަރު (12 ބިލިއަން ރުފިޔާ) ގެ މި މަޝްރޫއުއަކީ ރާއްޖޭގެ ތާރީހުގައި މި ބާވަތުގެ ޕްރޮޖެކްޓެއް ހިންގާ ފުރަތަމަ ފަހަރެވެ.