މައި 2 އިންތިހާބު އެއްކޮށްލާ އިސްލާހަށް ސިޔާސީ ޕާޓީތަކާއި އޭޖީގެ ހިޔާލު ހޯދަނީ

ރިޔާސީ އިންތިހާބާއި ރައްޔިތުންގެ މަޖިލީސް އިންތިހާބު އެއްކޮށްލުމަށް ގާނޫނުއަސާސީއަށް ހުށަހަޅާފައިވާ އިސްލާހަށް، ސިޔާސީ ޕާޓީތަކާއި ބަންޑާރަ ނައިބުގެ ހިޔާލު ހޯދުމަށް މަޖިލީހުގެ ކަމާގުޅޭ ކޮމިޓީން މިއަދު ނިންމައިފި އެވެ. 

ސަރުކާރުގެ ފަރާތުން ޕީއެންސީގެ ޕާލިމަންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހަޅުއްވާފައިވާ އެ އިސްލާހު މިނިވަން މުއައްސަސާތަކުގެ ކޮމިޓީން ދިރާސާކުރަމުން އަންނައިރު، އެ ކޮމިޓީގެ މިއަދުގެ ބައްދަލުވުމުގައި ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވީ ރާއްޖޭގެ ޑިމިކްރަސީ ހިނގަމުން ދަނީ މަލްޓިޕާޓީ ސިސްޓަމެއްގެ ތެރެއިން ކަމަށް ވާތީ، ސިޔާސީ ޕާޓީތަކާއެކު މަޝްވަރާކުރުން މުހިންމު ކަމަށެވެ.

އަދި އިންތިހާބުތައް ބޭއްވުމުގައި ގާނޫނީ ގޮތުން އަދާކުރާ ޒިންމާތައް އަދާކުރަނީ އިލްކެޝަންސް ކޮމިޝަނުން ކަމަށްވާތީ، އީސީގެ ހިޔާލު ހޯދަން ޖެހޭ ކަމަށް ޝުޖާއު ވިދާޅުވި އެވެ.

މީގެ އިތުރުން، މި އިސްލާހަށް ބަންޑާރަ ނައިބުގެ ހިޔާލު ހޯދަން ވެސް ޝުޖާއު ހުށަހެޅުއްވި އެވެ.

އެއާ އެކު، އަންނަ މަހުގެ 2 ވަނަ ދުވަހު، ސިޔާސީ ޕާޓީތަކާއި، އީސީ އަދި ބަންޑާރަ ނައިބާ އެކު ވަކިވަކިން ބައްދަލުވުންތައް ބާއްވައި، ހިޔާލު ހޯދުމަށް ޝުޖާއު ހުށަހެޅުއްވި ހުށަހެޅުން، ކޮމިޓީގެ އިއްތިފާގުން މިއަދު ވަނީ ފާސްކޮށްފަ އެވެ. 

ފަލާހު އެ ބިލު ހުށަހެޅުއްވި ސަބަބެއްގެ ގޮތުގައި ބަޔާންކޮށްފައި ވަނީ މަޖިލީހުގެ މެންބަރު ކަމަށް މީހުން ހޮވުމަށާއި ރައީސުލްޖުމްހޫރިއްޔާ ހޮވުމަށް ބާއްވާ އިންތިހާބު ބާއްވަން ވާނީ ދެ އިންތިހާބު އެކީގައި ކަމަށް ކަނޑައެޅުން ކަމަށެވެ. އަދި މަޖިލީހުގެ ދައުރު ގުނުމުގެ އުސޫލު އިސްލާހު ކުރުމަށް ކަމަށެވެ.

އެ ބިލުގައި ވަނީ، މަޖިލީސް އިންތިހާބު ބާއްވަންވާނީ ކޮންމެ ފަސް އަހަރަކުން ރައީސަކު ހޮވަން ބާއްވާ ރިޔާސީ އިންތިހާބާ އެކުގައި ކަމަށެވެ. އަދި މަޖިލީހުގެ އުމުރަކީ ޑިސެމްބަރު މަހުގެ އެއް ވަނަ ދުވަހުން ފެށިގެން ފަސް އަހަރު ދުވަސް ކަމަށް ވެސް އެ ބިލުގައިވެ އެވެ.

މި އިސްލާހު ފާސްވެ، އަމަލު ކުރަން ފެށުމުން 2028 ގެ ރިޔާސީ އިންތިހާބާއި 2029 ގެ މަޖިލިސް އިންތިހާބު ބާއްވަން ޖެހޭނީ އެކީގަ އެވެ. އަދި މިހާރު ހިނގަމުންދާ 20 ވަނަ މަޖިލީހުގެ ދައުރު ޑިސެމްބަރު 1، 2028 އަށް ހަމަވާނެ އެވެ.

މިހާރުގެ މަޖިލީސް ދައުރު ފެށުނީ މެއި 28، 2024 ގައެވެ. ގާނޫނު އަސާސީ މިހާރު އޮތް ގޮތުން ފަސް އަހަރުގެ ދައުރު ހަމަވާނީ މެއި، 2029 ގައެވެ. ނަމަވެސް މި އިސްލާހަށް އަމަލުކުރަން ފެށުމާއެކު ފަސް މަހެއްހާ ދުވަސް މި ދައުރުން އުނިވެގެން ދާނެ އެވެ.