އައްޑޫ ކެތު ލެބް ހުޅުވައި، ހިދުމަތް ދޭން ފަށައިފި
އައިޖީއެމްއެޗުން ބުނީ ހިދުމަތް ތައާރަފް ކުރުމަށްފަހު އިއްޔެ އެކަނިވެސް ހަ ބަލި މީހަކަށް ކާމިޔާބުކަމާއެކު ފަރުވާ ދީފައިވާ ކަމަށެވެ.
އައްޑޫ އިކުއަޓޯރިއަލް ހޮސްޕިޓަލުގައި ގާއިމްކުރި އިންޓަވެންޝަން ކާޑިއޮލޮޖީ ނުވަތަ ކެތު ލެބު، ހުޅުވައި، އިއްޔެ ހިދުމަތް ދޭން ފަށައިފި އެވެ.
އައްޑޫގައި ކެތު ލެބް ގާއިމްކުރީ 2023 ވަނަ އަހަރު އެވެ. ދޮޅު އަހަރު ފަހުން އެތަނުގެ ހިދުމަތް ދޭން ފަށާފައިވަނީ އައިޖީއެމްއެޗާ ގުޅިގެންނެވެ،
އައިޖީއެމްއެޗުން ނެރުނު ބަޔާނެއްގައި ބުނީ ދެ ހޮސްޕިޓަލުގެ ދެމެދު ވެވުނު އެއްބަސްވުމުގެ ދަށުން، އައިޖީއެމްއެޗްގެ ހިތުގެ ބަލިތަކާއި އިންޓަވެންޝަނަލް ކާޑިއޮލޮޖީގެ ހާއްސަ ސްޕެޝަލިސްޓް ޓީމެއް ކޮންމެ ދެ ހަފްތާއަކުން އެއްފަހަރު އައްޑޫއަށް ޒިޔާރަތް ކުރަން ހަމަޖެހިފައިވާ ކަމަށެވެ.
އެ ޓީމުގައި އިންޓަވެންޝަނަލް ކާޑިއޮލޮޖިސްޓުންނާއި، ކެތު ލެބް ޓެކްނީޝަނުންގެ އިތުރުން ތަޖުރިބާކާރު ނަރުހުން ހިމެނެ އެވެ.
އައިޖީއެމްއެޗުން ބުނީ ހިދުމަތް ތައާރަފް ކުރުމަށްފަހު އިއްޔެ އެކަނިވެސް ހަ ބަލި މީހަކަށް ކާމިޔާބުކަމާއެކު ފަރުވާ ދީފައިވާ ކަމަށެވެ.
"މިއީ އައްޑޫ ސިޓީގެ އިތުރުން މުޅި ސަރަހައްދުގެ ރައްޔިތުން ހިތުގެ ބޮޑެތި ބަލިތަކަށް ފަރުވާ ހޯދުމަށް މާލެއަށް ބަރޯސާވާންޖެހޭ މިންވަރު ކުޑަކޮށްދީ، އަމިއްލަ ރަށުގައި އާއިލާގެ ގާތުގައި ތިބެގެން ފެންވަރު ރަނގަޅު ސިއްހީ ހިދުމަތް ހޯދުމަށް ފަހިވެގެން ދިޔަ ފުރުސަތެއް،" އައިޖީއެމްއެޗުން ބުންޏެވެ.
އައިޖީއެމްއެޗްގެ މައިގަނޑު މަގުސަދަކީ މި ހިދުމަތް އެންމެ ފުރިހަމަ ފެންވަރުގައި، ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދިނުން ކަމަށްވެސް އެ ހޮސްޕިޓަލުން ބުންޏެވެ.
ކޮމެންޓް
Republic of Maldives