ރޯދައަށް މުދާ ބާލަން | ދަތިކަމުގަ އެމްޕީއެލްއިން ފުރިހަމަ މަސައްކަތެއް

ކޮންމެ އަހަރެއްގެވެސް ރޯދަ މަސް ފެށެން މަހަކަށްވުމާއެކު އެންމެ ޕްރެޝަރު ބޮޑުވާ އެއް ތަނަކީ މާލެ ވިޔަފާރި ބަނދަރެވެ. ނުވަތަ އެމްޕީއެލް ސަރަހައްދެވެ. ސަބަބަކީ ރޯދަމަހަށް ރާއްޖެ އަށް ގެންނަ މުދަލުގެ ބޮޑުބައެއް ބަނދަރުކުރާނީ މި ދުވަސްވަރަށްވުމެވެ. ނަމަވެސް 40 އަހަރަށްވުރެ ގިނަ ދުވަސްވެފައިވާ ބަނދަރަށް ކިތަންމެ ލޯޑެއް އައިނަމަވެސް މިތަނުގެ ޖާގައިގެ ދަތިކަމަށް ހަލެއް ލިބިފައެއް ނެތެވެ. ނަތީޖާއަކަށްވަނީ އެމްޕީއެލް މުވައްޒަފުން ދަތިކަމުގައިވެސް މަަސައްކަތް ކުރަން ޖެހުމެވެ. ނަމަވެސް މި އަހަރުވެސް މި ދަތިިކަމުގައި އެމްޕީއެލް އިން ދަނީ ކާމިޔާބު ބުރަ މަސައްކަތްތަކެއް ކުރަމުންނެވެ. އެކަން ފާހަގަ ކުރަނީ ވިޔަފާރިވެރިންނެވެ. 

"ހަގީގަތުގަ އެމްޕީއެލްއިން އެކުރަނީ ބުރަ މަސައްކަތެއް. އަހަރެމެންނަށް އެނގޭނީ އެމީހުންގެ މަސައްކަތް. މިހާ ކުޑަ ތަންކޮޅެއްގައި އެކުރާ ބުރަ މަސައްކަތް ފާހަަގަ ކުރަން،" ރާއްޖެ އަށް އެންމެ ގިނައިން މުދާ ގެންނަ ވިޔަފާރިވެރިއެއް ނަން ނުޖެހުމަށް އެދި ބުންޏެވެ. 

އެމްޕީއެލް އިން ބުނެފައިވާ ގޮތުގައި މިމަހުގެ 12 އިން ފެށިގެން ގިނަ އަދަދެއްގެ ކޮންޓެރިނަރު ބޯޓު ފަހަރު ވަނީ މާލެއަށް ބަނދަރުކޮށްފަ އެވެ. މި އުޅަނދު ފަހަރުން މާލޭ ވިޔަފާރި ބަނދަރަށް 3،901 ޓީއީޔޫ ނުވަތަ ކޮންޓެއިނަރު، ލޯޑްކުރުމަށް ޖުމްލަ 2،700 ޓީއީޔޫ އެވެ. މި ވަރަށް ލޯޑު އުފެދިގެން ދިޔައިރު މިމަހުގެ 27 ވަނަ ދުވަހުގެ ނިޔަލަށް ހުރި ބެކްލޮގް ވަނީ އެއްކޮށް ކްލިއަކޮށްފަ އެވެ. މީގެ އިތުރުން  ހަލާކުރާ ޒާތުގެ މުދާ ނުވަތަ ޕެރިޝަބަލް މުދާ ހިފައިގެން އަންނަ ބޯޓު ފަހަރުން މުދާ ބޭލުމުގެ މަސައްކަތް ވެސް ދަނީ ކުރިއަށެވެ.

މާލޭ ސަރަހައްދުގެ ކޮންޓޭނަރު ޓާމިނަލްތައް (މާލޭ ވިޔަފާރި ބަނދަރާއި ހުޅުމާލެ ޓަރމިނަލް)ގެ ޖުމްލަ ކެޕޭސިޓީ އަކީ 2،750 ޓީއީޔޫ އެވެ. އެހެން ނަމަވެސް، މި ވަގުތު ވެސް އެމްޕީއެލްގެ ޓާމިނަލްތަކުގައި ޖުމްލަ 5،338 ޓީއީޔޫ ބަހައްޓާފައިވެ އެވެ. ހަގީތުގަ މިއީ ވަރަށް ބޮޑު ލޯޑެކެވެ. 

ތަފާސް ހިސާބުތައް ދައްކާ ގޮތުގައި ރޯދަމަހުގެ ކުރިންނާއި ރޯދަމަހުގެ ތެރޭގައި ދުވާލަކު އެވްރެޖްކޮށް 200 އާއި 300 އާ ދެމެދުގެ އަދަދަކަށް ކޮންޓޭނަރު ބަނދަރަށް ބާލަން ޖެހެ އެވެ. މީގެތެރޭގައި ޕެރިޝަބަލް މުދާ ގިނަ އެވެ. މީގެ އިތުުރުން ޕްރެޝަބަލް މުދާ ކަމަށްވާ ފިޔާ، އަލުވި، ބިސް އަދި މޭވާ ފަދަ އަވަހަށް ހަލާކުވާ ބާވަތްތައް ބަރުކޮށްފައިވާ ބޯޓު ފަހަރުގެ އަދަދު ވެސް އިތުރު ވެގެންދެ އެވެ. 

ރާއްޖޭގެ ރިސޯޓްތައް އިތުރުވެ ރާއްޖެއަށް ގެންނަ މުދާ އިތުރު ވެއްޖެ އެވެ. އެކަމަކު މާލެ ވިޔަފާރި ބަނދަރުގެ ޖާގަ ބޮޑުވެފައެއް ނެތެވެ. ނަމަވެސް މިހާރުގެ އުންމީދަކީ މި އަހަރު މާލެ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ ބިޔަ މަޝްރޫއު ފެށުމެވެ. ހަގީީގީ ކުރިއެރުމާއި ތަރައްގީ ފެނިގެންދާނީ އެ ދުވަހަކުންނެވެ.