ގިރާވަރުފަޅުން ދޫކުރާ ގޯތިތަކުގެ ގުރު ނެގުން އަންނަ ހޮނިހިރު ދުވަހު

ގިރާވަރުފަޅުގެ ލޭންޑް ޔޫސް ޕްލޭން ބަދަލުކޮށް، އާ ލޭންޑް ޔޫސް ޕްލޭނާ އެއްގޮތަށް ގިރާވަރުފަޅުން ގޯތި ލިބުނު މީހުންގެ މެދުގައި އަންނަ ހޮނިހިރު ދުވަހު ގުރުއަތު ނަގަން ނިންމާފައިވާ ކަމަށް ހައުސިން މިނިސްޓްރީން ބުނެފި އެވެ.

ހައުސިން މިނިސްޓްރީން މިރޭ ނެރުނު ބަޔާނެއްގައި ބުނީ ކުރިން ހަދާފައިވާ ގިރާވަރުފަޅުގެ ލޭންޑް ޔޫސް ޕްލޭންގައި 610 ގޯތި މަދުވާތީ، އާ ލޭންޑް ޔޫސް ޕްލޭނެއް ތައްޔާރުކޮށް މިދިޔަ ހޯމަ ދުވަހު ގެޒެޓްކޮށްފައިވާ ކަމަށެވެ. އާ ޕްލޭނާއެކު އެފަޅުން 4،072 ގޯތި ދޫކުރާނެ އެވެ.

އެ ބަދަލާއެކު، ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އައިސް، އާ ލޮޓް ނަންބަރު ކަނޑައަޅާފައިވާ ކަމަށް މިނިސްޓްރީން ބުންޏެވެ. 

އެހެންކަމުން، އާ ޕްލޮޓްތަކުގެ ގުރު ނެގުން އޮންނާނީ އަންނަ ހޮނިހިރު ދުވަހުގެ ހެނދުނު 9:30 ގައި ސޯޝަލް ސެންޓަރުގަ އެވެ.

މިނިސްޓްރީން ބުނެފައިވަނީ، ގުރުއަތު ނަގާ ހޯލަށް ވަދެވޭނީ ބިން ލިބިފައިވާ ފަރާތް ނުވަތަ ފަރާތްތަކުގެ ތެރެއިން ކޮންމެ ޕްލޮޓަކަށް ވެސް އެކަކަށެވެ. އަދި ގުރު ނަގައިގެން ލިބޭ ޕްލޮޓު ހިޔާވަހި ޕޯޓަލް މެދުވެރިކޮށް ވަގުތުން ފެންނާނެ ކަމަށާއި، އެމީހަކަށް ލިބުނު ޕްލޮޓް ނަމްބަރު އެސްއެމްއެސް މެދުވެރިކޮށް ފޮނުވާނެ ކަމަށްވެސް ބުންޏެވެ.