ކާބޯތަކެތީގެ ހިދުމަތް ދޭ ތަންތަނުގެ ރަޖިސްޓްރޭޝަން ފީ ދެ ބައިކުޅަ އެއްބައި ކުޑަކޮށްފި

ކާބޯތަކެތީގެ ހިދުމަތް ދޭ ތަންތަން ރަޖިސްޓްރީ ކުރުމަށް ނަގާ ފީ، މިއަދުން ފެށިގެން ކުރިއަށް ދެ އަހަރަށް، ދެ ބައި ކުޅަ އެއް ބައި ކުޑަކޮށްފި އެވެ.

އެމްއެފްޑީއޭއިން މިއަދު ކުރި އިއުލާނެއްގައި ބުނީ، ކާބޯތަކެތީގެ ހިދުމަތް ދޭ ތަންތަން ރަޖިސްޓްރީކުރުމަށް ނަގާ ފީއާއި ކެޓަގަރީ ފީ ކުޑަކުރަން ނިންމާފައިވާ ކަމަށެވެ.

މި ގޮތުން، މިއަދުން ފެށިގެން ކުރިއަށް އޮތް ދެ އަހަރު ދުވަހުގެ މުއްދަތަކަށް، ކާބޯތަކެތީގެ ހިދުމަތް ދޭ ތަންތަނުން ނަގާ ރަޖިސްޓްރޭޝަން ފީ އާއި ކެޓަގަރީ ފީ 50 ޕަސެންޓަށް ކުޑަކުރަން ނިންމާފައިވާކަމަށް އިއުލާނުގައި ބުންޏެވެ. 

ކާބޯތަކެތީގެ ހިދުމަތް ދޭ ތަންތަނަށް ފަރާތްތައް ރަޖިސްޓްރީކޮށް ލައިސަންސް ދޫކުރުމުގައި އަމަލު ކުރާނެ ގޮތުގެ އިންތިގާލީ އުސޫލުގެ ގަވައިދުގައި ވަނީ ކާބޯތަކެތީގެ ހިދުމަތް ދޭ ތަންތަން 14 ކެޓަގަރީއަކަށް ބަހާލައިފަ އެވެ. 

ހުރިހާ ތަނަކަށް ވެސް ރަޖިސްޓްރޭޝަން ފީގެ ގޮތުގައި 500ރ. ކަނޑައަޅާފައިވާއިރު، މިއީ އެއް ފަހަރު ނަގާ ފީއެކެވެ. ނަމަވެސް އެމްއެފްޑީއޭއިން ގެނައި ބަދަލާއެކު ދެން ރަޖިސްޓްރޭޝަން ފީގެ ގޮތުގައި ނަގާނީ 250ރ. އެވެ. 

މީގެ އިތުރުން، އަހަރީ ފީގެ ގޮތުގައި 2،000ރ. އިން ފެށިގެން އެކި އަގުތައް އެކި ކެޓަގަރީތަކުގެ ތަންތަނުން ނަގާއިރު، އެ އަގުތަކުގެ ވެސް ދެން ދައްކަންޖެހޭނީ ދެބައިކުޅަ އެއްބަ އެވެ.