ބީއެމްއެލް ކްރެޑިޓް ކާޑުގެ ޑޮލަރު ލިމިޓު ބޮޑު ތަނުން މައްޗަށް

ބީއެމްއެލްގެ ކްރެޑިޓް ކާޑުތަކަށް މިހާރު ދީފައިވާ ޑޮލަރު ލިމިޓު ބޮޑު ތަނުން އަންނަ މަހުގެ އެކަކުން ފެށިގެން މައްޗަށް ޖައްސަން ނިންމައިފި އެވެ. 

ބީއެމްއެލް އިން އަންނަ މަހުގެ އެއްވަނަ ދުވަހުން ފެށިގެން މި ބަދަލާއެކު، ކްލެސިކް ކްރެޓިޑް ކާޑުތަކުގެ ލިމިޓް ވަނީ 750 ޑޮލަރުން 1400 ޑޮލަރަށް މަތިކޮށްފަ އެވެ. 

އަދި ގޯލްޑް ކްރެޓިޑް ކާޑުތަކުގެ ލިމިޓް ވަނީ 750 ޑޮލަރުން 1500 ޑޮލަރަށް މަތިކޮށްފަ އެވެ. މީގެ އިތުރުން ޕްލެޓިނަމް ކްރެޑިޓް ކާޑުތަކުގެ ލިމިޓް ވަނީ 1500 ޑޮލަރުން 3،000 ޑޮލަރަށް މަތިކޮށްފަ އެވެ. 

ބީއެމްއެލް އިން ބުނީ ކްރެޑިޓް ކާޑުގެ ލިމިޓް މަތި ކުރިނަަމަވެސް ޑެބިޓް ކާޑު ބޭނުން ކުރެވޭ ގޮތަށް ބަދަލެއް ނާންނާނެ އެވެ. 


ބީއެމްއެލް އިން ވަނީ މިމަހުގެ އެއްވަނަ ދުވަހުން ފެށިގެން ޑެބިޓް ކާޑުތަކުގެ ލިމިޓުވެސް މަތިކޮޑްފަ އެވެ. މި ބަދަލާއެކު  ބޭސްފަރުވާގެ ބޭނުމަށާއި ދަތުރުފަތުރުގެ ބޭނުމަށް ބޭރުގައި ޚަރަދުކުރެވޭ މިންވަރު ވެސް ވަނީ މަހަކު 3,000 ޑޮލަރަށް އިތުރުކޮށްފަ އެވެ. މި ބަދަލާއެކު ރާއްޖޭން ބޭރަށް ދަތުރު ކުރަން ބޭނުންވާ ބީއެމްއެލް ކަސްޓަމަރުން އެކައުންޓުގައި ދިވެހި ރުފިޔާ ހުރެއްޖެނަމަ އެއާލައިންތަކުގެ ސައިޓްތަކުން ޑައިރެކްޓްކޮށް ދުރާލާ ޓިކެޓު ގަތުމުގެ ފުރުސަތު ލިބޭނެ އެވެ. އަދި ކާޑުން ހޮޓަލަށް ފައިސާ ދެއްކުމުގެ ގާބިލްކަން ވެސް އިތުރުވާނެ އެވެ. މިހާރު ޓިކެޓު ނަަގަން ކުރިމަތިވާ އެންމެ ބޮޑު ހުރަހަކީ ކާޑުގައި 250 ޑޮލަރުގެ ލިމިޓެއް އިންނާތީ އެ ވަރުން ނުވުމެވެ.

ބީއެމްއެލް އޭޓީއެމް ހިދުމަތް މުޅިރާއްޖެ އަށް ފުޅާކުރުން ފާހަގަ ކުރަން ބޭއްވި ރަސްމިއްޔާތުގައި ސީއީއޯ އަދި އެމްޑީ މުހައްމަދު ޝަރީފު ވިދާޅުވެފައިވާ ގޮތުގައި އެކި ބޭނުންތަކަށް ޑޮލަރު ދޫކުރާ މިންވަރު އިތުރުކޮށްދެވޭ ހާލަތެއްގައި އެވެ. މި ބަަދަލު ގެނެސްފައިވަނީ ބޭންކަށް ކުރިން ދިމާވެފައިވާ ފޮރިން އެކްސްޗޭންޖް ޝޯޓް ޕޮޒިޝަން ހަރުދަނާ ސިޔާސަތެއްގެ ދަށުން ރަނގަޅު ކުރަން ސަރުކާރުން އެހީތެރިވެ ދިނުމުންނެވެ.

މި ބަދަލު ގެނައިނަމަވެސް ރާއްޖޭން ބޭރަށް ފުރާ މީހުންނަށް ދޫކުރާ 500 ޑޮލަރު މިހާރުވެސް އެގޮތަށް ލިބޭނެ އެވެ. މީގެ އިތުރުން އާސަންދަ ބަލި މީހުންނަށް ބީއެމްއެލް އިން ޑޮލަރު ދޫކުރެ އެވެ. އަދި އުމްރާ ވެރިންނާއި ހައްޖު ވެރިންނަށްވެސް ވަކިން ޑޮލަރު ދޫކުރެ އެވެ.