ހުޅުމާލެ 3 ގެ ގޯތިތަކަށް އާ ރަޖިސްޓްރީއެއް | ގުޅިފަޅު ގޯތި އެއްބަސްވުމަށް އިތުރު ފުރުސަތެއް

ކުރީގެ ސަރުކާރުގެ ބިންވެރިޔާ ސްކީމްގެ ދަށުން، ދާދި ފަހުން ހިއްކައި ނިންމި ހުޅުމާލެ ފޭސް 3 ގޯތި ލިބުނު މީހުންނަށް އާ ރަޖިސްޓްރީއެއް ހަދައިދީ، އަދި ގުޅިފަޅުން ގޯތި ލިބުނު މީހުންނަށް ވެސް ގޯތީގެ އެއްބަސްވުމުގައި ސޮއި ކުރުމަށް އަނެއްކާވެސް އިތުރު ފުރުސަތެއް ދީފި އެވެ.

ހައުސިން މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ، ހުޅުމާލެ ފޭސް 3 ގެ ލޭންޑް ޔޫސް ޕްލޭނަށް ގެނައި ބަދަލާއެކު، އެ ތަނުން ދޫކުރި ގޯތިތަކަށް ބަދަލު އައިސްފައިވާ ކަމަށެވެ. މިގޮތުން، މިދިޔަ މަހުގެ 20 ވަނަ ދުވަހު ވަނީ ގޯތި ލިބުނު މީހުންގެ މެދުގައި އަލުން ގުރުއަތު ނަގައިފަ އެވެ. 

މިނިސްޓްރީން ކުރި އިއުލާނުގައިވާ ގޮތުން، ހުޅުމާލެ ފޭސް 3 އިން ކުރިން ދޫކުރި "ބަންޑާރަ ގޯތީގެ ރަޖިސްޓްރީ" ބާތިލުކޮށް، އާ ރަޖިސްޓަރީއެއް ދޫކުރަން ވަނީ ހަމަޖައްސައިފަ އެވެ.

އަދި މިހާތަނަށް ރަޖިސްޓަރީ ހަވާލުނުކުރާ މީހުންނަށް ރަޖިސްޓަރީ ހަވާލުކުރުމާއި ގޯތި ހަވާލުކުރުމުގެ އެއްބަސްވުމުގައި އަލުން ސޮއިކުރަން ހަމަޖެހިފައިވާކަމަށް މިނިސްޓްރީން ބުންޏެވެ.

އެއާ އެކު، އިއްޔެއިން ފެށިގެން އަންނަ މާޗް މަހުގެ 15 ވަނަ ދުވަހާ ހަމައަށް "ހިޔާވެހި ޕޯޓަލް" މެދުވެރިކޮށް "ބަންޑާރަ ގޯތީގެ ރަޖިސްޓްރީ" އާ ހަވާލުވުމަށް އެޕޮއިންޓްމަންޓަށް އެދުމުގެ ފުރުސަތު ހުޅުވާލާފައިވާ ކަމަށް ބުނެފައިވެ އެވެ.

ހުޅުމާލެ ފޭސް 3 ގެ އިތުރުން، ގުޅިފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ހަވާލުވެފައި ނުވާ މީހުންނަށް ވެސް އިތުރު ފުރުސަތެއް ދޭން ނިންމާފައިވާ ކަމަށް އެ އިއުލާނުގައި ބުންޏެވެ. 

އެ މީހުންނަށް ހިޔާވަހި ޕޯޓަލް މެދުވެރިކޮށް އެޕޮއިންޓުމަންޓަށް އެދެވޭނެ ކަމަށް އިއުލާނުގައި ބުންޏެވެ.

ބިންވެރިޔާ ސްކީމްގެ ދަށުން ކުރީގެ ސަރުކާރުން ވަނީ ހުޅުމާލެ އާއި ގުޅިފަޅު އަދި ގިރާވަރުފަޅުން 9،000 އަށް ވުރެ ގިނަ ގޯތި މާލޭ މީހުންނަށް ދޭން ނިންމާފައިވާއިރު، އޭގެ ތެރެއިން ގިނަ ގޯތިތައް މި ސަރުކާރުން މިހާރު ވަނީ ހަވާލުކޮށްފަ އެވެ.