ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތް ކުރިއަށް ގެންދާނަން: މޯދީ

ރާއްޖެއާއި އިންޑިއާގެ ރައްޔިތުންގެ މަންފާއަށްޓަކައި އެކުގައި ކުރަމުންދާ މަސައްކަތް ކުރިއަށް ގެންދަވާނެ ކަމަށް އިންޑިއާގެ ބޮޑުވަޒީރު، ނަރެންދުރަ މޯދީ ވިދާޅުވެއްޖެ އެވެ. 

މޯދީ މިހެން ވިދާޅުވީ އިއްޔެ ފާހަގަކުރި އިންޑިއާގެ ޖުމްހޫރީ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ފޮނުއްވި ތަހުނިޔާ މެސެޖަށް ރައްދު ދެއްވަމުންނެވެ.

ދިވެހި ބަހުން މިއަދު އެކްސްގައި ކުރެއްވި ޕޯސްޓެއްގައި މޯދީ ވިދާޅުވީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސް މުއިއްޒު އަރިސް ކުރެއްވި ހޫނު ތަހުނިޔާއާއި ހެޔޮއެދުން އިޙްތިރާމާއިއެކު ބަލައިގަންނަ ކަމަށެވެ.

"ދެ ގައުމުގެ ރައްޔިތުންގެ މަންފާއަށްޓަކައި އެކުގައި މިކުރާ މަސައްކަތް ކުރިއަށްގެންދާނަން. އެންމެހާ ދިވެހި ރައްޔިތުންނަށް ކުރިއަށް އޮތީ އުފާވެރި ފާގަތި ދުވަސްތަކެއްކަމުގައި އެދެން،" މޯދީ ވިދާޅުވެފައިވެ އެވެ.

އިންޑިއާގެ ޖުމްހޫރީ ދުވަހާ ގުޅިގެން ރައީސް މުއިއްޒު ވަނީ މޯދީއަށް ތަހުނިޔާގެ ސިޓީފުޅެއް ފޮނުއްވާފަ އެވެ. އެ ސިޓީފުޅުގައި، ދެ ގައުމުގެ 60 އަހަރުވީ ރަޙުމަތްތެރިކަން ބިނާކޮށްފައިވަނީ އެއް ގައުމުން އަނެއް ގައުމަށް ކުރާ އިތުބާރާއި، އިހުތިރާމާއި ފަހުމުވުންތަކުގެ ބިންގަލުގެ މަތީގައިކަމަށް ވިދާޅުވެފައިވެ އެވެ.

އޭގެ އިތުރުން، ބޮޑުވަޒީރު މޯދީގެ ބެއްލެވުމުގެ ދަށުން، ސަރަހައްދީ ފެންވަރުގައި އިންޑިއާއިން ދައްކާ އިސްނެގުން ފާހަގަކުރައްވައި، ކުރިއަށް އޮތް ދުވަސްތަކުގައި ވެސް ދެ ގައުމުން މަސްލަހަތު ހިމެނޭ ކަންކަމުގައި ގުޅުން ހަރުދަނާކޮށް، އަމަލީގޮތުން އެއްބާރުލުން ދިނުން އިތުރުކުރުމުގެ އަޒުމުގައި ސަރުކާރުން މަސައްކަތް ކުރައްވާނެ ކަމަށް ރައީސް ވިދާޅުވެފައިވެ އެވެ.