ހުޅުމާލޭގައި ގާއިމްކުރި ޝަހީދު އަލީ ސްކޫލު ހުޅުވައި، ކިޔެވުން ފަށައިފި

ހުޅުމާލޭ ދެ ވަނަ ފިޔަވަހީގައި ސަރުކާރުން ގާއިމްކުރި ޝަހީދު އަލީ ސްކޫލް ހުޅުވައި، މިއަދު ކިޔަވައިދޭން ފަށައިފި އެވެ.

ޒަމާނީ ފެންވަރަށް ތަރައްގީ ކޮށްފައިވާ މި ސްކޫލަކީ މި ސަރުކާރުން އަލަށް ހުޅުވާ ފުރަތަމަ ސްކޫލެވެ. ސްކޫލް ހުޅުމުގެ ގޮތުން މިއަދު ވަނީ ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ ދެކަނބަލުންނާއި އެޑިއުކޭޝަން މިނިސްޓަރު ޑރ. އިސްލާއިމް ޝަފީއުގެ އިތުރުން ސަރުކާރުގެ އެހެން އިސްވެރިން ވަނީ ބައިވެރިވެވަޑައިގެންފަ އެވެ.

މި ރަސްމިއްޔާތުގައި ރައީސްއަށް ވަނީ ހަނދާނީ ހަދިޔާއެއް އަރުވާފަ އެވެ. އަދި ސްކޫލް ރަސްމީކޮށް ހުޅުވުމުގެ ގޮތުން، ސްކޫލްގެ ލޯގޯ ވަނީ އިފްތިތާހުކޮށްފަ އެވެ.

އެޑިއުކޭޝަން މިނިސްޓްރީން މައުލޫމާތުދޭ ގޮތުގައި، ޝަހީދު އަލި ރަސްގެފާނުގެ ނަމުން ނަން ދީފައިވާ މި ސްކޫލުގައި ގާތްގަނޑަކަށް 2100 ދަރިވަރުންނަށް ޖާގަ ދީފައިވެ އެވެ. އޭގެތެރެއިން 77 ޕަސެންޓަކީ އަތޮޅުތެރެއަށް ނިސްބަތްވާ ދަރިވަރުންނެވެ.

މި ސްކޫލުގައި ގްރޭޑް1-10އަށް ދެ ދަންފަޅިއަށް ބަހާލައިގެން ކިޔަވައިދޭއިރު، 230 ޓީޗަރުން ހަރަކާތްތެރިވާނެ އެވެ.

އެންމެ ޒަމާނީ ފެންވަރަށް ތަރައްގީކޮށްފައިވާ މި ސްކޫލަކީ 1500 ދަރިވަރުންގެ ޖާގައިގެ ސްކޫލެކެވެ. ނަމަވެސް އެތަނުގައި 2500 ދަރިވަރުންނަށް ކިޔަވައިދެވޭނެ ވަސީލަތްތައް ގާއިމްކޮށްފައިވާނެ ކަމަށް މިނިސްޓްރީން ބުނެފައިވެ އެވެ. އެގޮތުން 32 ކުދިންނަށް ކިޔަވައިދެވޭނެ ޖާގައިގެ 54 ކްލާސްރޫމް ވަނީ ގާއިމްކޮށްފައިވާ ކަމަށް މިނިސްޓްރީން މައުލޫމާތުދެ އެވެ.

އެ ސްކޫލްގައި 400 ކުދިންގެ ޖާގައިގެ އޮޑިޓޯރިއަމްއަކާއި އިންޑޯ ކުޅިވަރުތައް ކުޅޭނެ ޖާގައިގެ އިތުރުން، ޓާފް ދަނޑެއްވެސް ވަނީ ގާއިމްކޮށްފަ އެވެ. އަދި ބޭރުގައި ކުދިންނަށް ކުޅިވަރު ކުރެވޭ އިންތިޒާމްވެސް ހަމަޖައްސާފައިވެ އެވެ.

އޭގެ އިތުރުން، މަލްޓިޕާޕަސް ހޯލަކާއި ލައިބްރަރީއާއި 3 ސައިންސް ލެބްގެ އިތުރުން ކޮމްޕިއުޓަރު ލެބެއްވެސް ހުރެ އެވެ. އަދި ގިނަ ކުދިންނަށް އެއް ފަހަރާ އެރޭވަރުގެ ތިން ލިފްޓް ވެސް އެ ސްކޫލުގައި ހުރެ އެވެ. 

ހުޅުމާލެ ދެވަނަ ދިޔަވައްސަކީ ބޮޑު އާބާދީއެއް ދިރިއުޅެމުންދާ އަވަށަކަށްވުމުން، މި ސްކޫލަކީ އެ ސަރަހައްދުގައި ދިރިއުޅޭ ރައްޔިތުންނަށް އެތައް ގޮތަކުން ފަސޭހަކަމެއް ގެނެސްދިން ސްކޫލެކެވެ. އަދި މިއީ މިހާ ގިނަ ވަސީލަތްތަކާއެކު މިފަހުން ގާއިމްކުރި ފުރަތަމަ ސްކޫލަށްވެސް ވެދާނެ އެވެ.