އިޓަލީ އެމްބަސީ މުވައްޒަފުންނަށް ބަޑިން ބިރު ދެއްކުން އިސްރާއީލު ސަފީރު ހާޒިރުކޮށްފި

އިސްރާއީލުން ހިފާފައިވާ ހުޅަނގު އައްސޭރީގައި ހަރަކާތްތެރިވަމުން ދިޔަ އިޓަލީގެ ދެ ފުލުހަކަށް، ހަތިޔާރު އެޅި އިސްރާއީލު މީހަކު ބަޑިން ބިރުދައްކައި ކުޑަކަކޫ މައްޗަށް ބޭތިއްބި މައްސަލައިގައި އިޓަލީ ސަރުކާރުން އިސްރާއީލާ ދެކޮޅަށް ވަރުގަދަ އިހުތިޖާޖެއް ކޮށްފި އެވެ.

މި ހާދިސާއާ ގުޅިގެން އިޓަލީގެ ފޮރިން މިނިސްޓްރީން ވަނީ ރޯމްގައި ހުންނަވާ އިސްރާއީލުގެ ސަފީރު ހާޒިރުކޮށް، އެ ގައުމުގެ ނުރުހުން ރަސްމީކޮށް އަންގާފަ އެވެ.

ހާދިސާ ހިނގި ގޮތް- އިޓަލީގެ މިލިޓަރީ ފުލުހުންގެ ދެ އޮފިސަރުންނަށް ބިރުދައްކާފައިވަނީ މިދިޔަ އާދީއްތަ ދުވަހު، ރާމަﷲ ކައިރީގައި އޮންނަ އަވަށަކަށް ވިލާތުގެ އިއްތިހާދު (އީ.ޔޫ) ގެ ސަފީރުން ކުރެއްވުމަށް ހަމަޖެހިފައިވާ ޒިޔާރަތެއްގެ ކުރިން އެ ސަރަހައްދު ބަލައި ފާސްކުރަމުން ދަނިކޮށެވެ. އެ ދެ ފުލުހުންނަށް ބަޑިން ބިރުދައްކައި، މަގުމަތީގައި ކުޑަކަކޫ މައްޗަށް ބޭތިއްބުމަށްފަހު ސުވާލުކޮށް ހަދާފައިވަނީ އިސްރާއީލުން ހިފާފައިވާ ބިމުގައި ގަދަކަމުން ވަޒަންވެރިވެގެން އުޅޭ މީހެކެވެ.

މި ހާދިސާ ހިނގިއިރު، އެ އޮފިސަރުން ދަތުރުކުރަމުން ދިޔައީ ޑިޕްލޮމެޓިކް ނަންބަރު ބޯޑު ހަރުކޮށްފައިވާ އުޅަނދެއްގަ އެވެ. އަދި އަތުގައި ޑިޕްލޮމެޓިކް ޕާސްޕޯޓު ވެސް އޮތެވެ.

އިޓަލީގެ ފޮރިން މިނިސްޓަރު އެންޓޯނިއޯ ތަޖާނީ ވިދާޅުވީ މިއީ ބަލައިގަނެވޭނެ ކަމެއް ނޫން ކަމަށާއި މިކަމާ މެދު އިސްރާއީލު ސަރުކާރަށް ވަރުގަދަ އިހުތިޖާޖެއް ހުށަހެޅުމަށް ބޭނުންވާ ކަމަށެވެ. މީގެ އިތުރުން، އިސްރާއީލުގައި ހުންނަ އިޓަލީގެ އެމްބަސީން ވެސް ވަނީ އެ ގައުމުގެ ފޮރިން މިނިސްޓްރީއަށާއި، އަސްކަރިއްޔާ އަށް އަދި ޝިން ބެޓް ސެކިއުރިޓީ އެޖެންސީއަށް މި މައްސަލަ ރަސްމީކޮށް ހުށަހަޅާފަ އެވެ.

މި ހާދިސާގައި ދެ އޮފިސަރުންނަށް އެއްވެސް ޖިސްމާނީ އަނިޔާއެއް ލިބިފައެއް ނުވެ އެވެ. އަދި ހާދިސާއަށްފަހު އެ ދެ މީހުން ވަނީ ގުދުސްގައި ހުންނަ އިޓަލީގެ ކޮންސިއުލޭޓަށް ރައްކާތެރިކަމާއެކު އެނބުރި ގޮސްފަ އެވެ.