ދިރާސީ އާ އަހަރުގެ ކިޔެވުން ފަށައިފި

މިއަހަރުގެ ދިރާސީ އާ އަހަރުގެ ކިޔެވުން މިއަދު ފަށައިފި އެވެ.

ދިރާސީ އާ އަހަރުގެ ކިޔެވުން ފަށާފައި މިވަނީ މަސްދުވަހުގެ ބޮޑު ޗުއްޓީއަކަށް ފަހު އެވެ. މިދިޔަ ދިރާސީ އަހަރު ނިންމައި ދަރިވަރުން ބޮޑު ޗުއްޓީއަށް ޑިސެމްބަރު 25 ވަނަ ދުވަހު އެވެ.

އެޑިއުކޭޝަން މިނިސްޓްރީން އާންމުކުރި ތަފާސްހިސާބުތަކުން އެނގޭ ގޮތުގައި، މިފެށުނު އާ ދިރާސީ އަހަރު ޕްރީ-ސްކޫލުން ފެށިގެން ގްރޭޑު 12 އާ ހަމައަށް ސަރުކާރުގެ 219 ސްކޫލެއްގައި ކިޔަވައިދޭނެ އެވެ. ސްކޫލުތަކުގައި 80،715 އަށްވުރެ ގިނަ ދަރިވަރުން މި އަހަރު ތައުލީމު ހާސިލް ކުރާނެ އެވެ.

އެ ކުދިންނަށް ކިޔަވައިދިނުމަށް 10500 ޓީޗަރުން ހަރަކާތްތެރިވާނެ އެވެ. އޭގެ ތެރޭގައި ހިމެނެނީ 8،000 ދިވެހި ޓީޗަރުންނާއި 2500 ބިދޭސީ ޓީޗަރުންނެވެ.

އޭގެ އިތުރުން، މުޅި ރާއްޖެއިން 4،790 ދަރިވަރުން ސަރުކާރު ސްކޫލްތަކަށް ވަނީ ގްރޭޑް 1 އަށް އަލަށް ވައްދާފަ އެވެ. އޭގެ ތެރެއިން މާލެ ސަރަހައްދުގެ ސްކޫލްތަކަށް 1،748 ކުދިން ވައްދާފައިވެ އެވެ. އަދި އަތޮޅުތަކުން މާލެއަށް 1،530 ދަރިވަރުން ބަދަލުވެފައިވެ އެވެ. 

މިއަހަރުގެ އެކެޑެމިކް ކަލަންޑަރުގައިވާ ގޮތުން، މިއަހަރުގެ ފުރަތަމަ ޓާމް ނިމެނީ ޖުލައި 17 ވަނަ ދުވަހު އެވެ. އަދި ފުރަތަމަ ޓާމު ޗުއްޓީއަށް ދިއުމަށްފަހު ދެވަނަ ޓާމުގެ ކިޔެވުން ފެށޭނީ އޮގަސްޓް ދެވަނަ ދުވަހު އެވެ. ދެވަނަ ޓާމް ނިމި، ބޮޑު ޗުއްޓީ ލިބޭނީ ޑިސެމްބަރު 18 އިން ޖެނުއަރީ 12 އަށެވެ.