އެމެރިކާ މާކެޓަށް މަޓާޓޯ | ޓޫރިޒަމް ފަރާތްތަކަށް ބައިވެރިވާން ފުރުސަތު

އެމެރިކާގެ ލަސްވޭގަސްގައި ބޭއްވުމަށް ހަމަޖެހިފައިވާ "ލަސްވޭގަސް ޓްރެވަލް އެޖެންޓް ފޯރަމް" ގައި ބައިވެރިވުމުގެ ފުރުސަތު ރާއްޖޭގެ ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން ހުޅުވާލައިފި އެވެ.

މި ފޯރަމަކީ 2026 ވަނަ އަހަރުގެ މެއި މަހުގެ 12 އިން 15 އަށް ލަސްވޭގަސްގެ މަޝްހޫރު ޕެރިސް ލަސްވޭގަސް ހޮޓެލް އެންޑް ކެސީނޯގައި ބޭއްވުމަށް ހަމަޖެހިފައިވާ ބޮޑު ހަރަކާތެކެވެ.

މުހންމު ފޯރަމެއް - އެމެރިކާ އާއި ކެނެޑާގެ 1,000 އަށްވުރެ ގިނަ ނުފޫޒުގަދަ ޓްރެވަލް އެޑްވައިޒަރުން ބައިވެރިވާ ފެއާ އެކެވެ. މިއީ އުތުރު އެމެރިކާގެ މާކެޓުގައި ރާއްޖޭގެ މަގުބޫލުކަން އިތުރުކުރުމާއި، ބީ.ޓު.ބީ އުސޫލުން ގުޅުން ބަދަހިކުރުމެވެ.

މަޓާޓޯ އިން ބުނި ގޮތުގައި އެމެރިކާއަކީ ރާއްޖެއަށް އެންމެ ގިނައިން ފަތުރުވެރިން އަންނަ 10 ގައުމުގެ ތެރޭގައި ހިމެނޭ، އިސްތިރާޖީ ގޮތުން ނުހަނު މުހިންމު މާކެޓެކެވެ. ޚާއްސަކޮށް ލަގްޒަރީ ފަތުރުވެރިކަމަށް ލޯބިކުރާ ފަރާތްތަކަށް އަމާޒުކޮށްގެން ބާއްވާ މި ފޯރަމަކީ ރާއްޖޭގެ ރިސޯޓުތަކާއި، ޓްރެވަލް އެޖެންޓުންނަށް ލިބޭ ރަނގަޅު ފުރުސަތެކެވެ.

މި ފޯރަމްގައި ރާއްޖޭގެ ފަރާތުން ބައިވެރިވާ ފަރާތްތަކުގެ ކަންކަން ބަަހައްޓާ ރެޖިސްޓްރޭޝަންގެ ކަންކަމުގައި އިސްކޮށް ހަރަކާތްތެރިވާނީ މަޓާޓޯއިންނެވެ. ބައިވެރިވުމަށް ޝައުގުވެރިވާ ފަރާތްތަކުން މަޓާޓޯގެ ސާކިއުލާގައިވާ ގޮތުގެ މަތިން ކަނޑައެޅިފައިވާ ސުންގަޑީގެ ކުރިން ބައިވެރިވުމަށް މަޓާޓޯއިން އެދިފައިވެ އެވެ.