ޑްރަގު އެތެރެކުރި ދެ މަސްބޯޓު ލަންކާއިން އަތުލައިގެންފި

ސްރީ ލަންކާއަށް މަސްތުވާތަކެތި އެތެރެކުރަން ބޭނުންކުރި ދެ މަސްބޯޓު، އެ ގައުމުގެ ކަނޑުގެ ސިފައިންނާއި ފުލުހުން ހިންގި އޮޕަރޭޝަނެއްގައި އަތުލައިގެންފި އެވެ. 

ލަންކާގެ ދެކުނުގެ ކަނޑުމަތިން އެ މަސްބޯޓު އަތުލައިގަތްއިރު، އެ ދެ ބޯޓުން ގާތްގަނޑަކަށް 270 ކިލޯގެ މަސްތުވާތަކެތި ފެނިފައިވާ ކަމަށް ފުލުހުން ބުންޏެވެ. 

އެ އޮޕަރޭޝަންގައި އެ ދެ ބޯޓުން ޖުމްލަ 11 މީހަކު ހައްޔަރުކޮށްފައިވާ ކަމަށް ވެސް ފުލުހުން ބުނެފައިވެ އެވެ. 

އަތުލައިގަތް މަސްތުވާތަކެތި ޑިކޮޓީވާ ފިޝަރީޒް ހާބަރަށް އިއްޔެ ގެންގޮސް ބަލައި ފާސްކުރުމަށް ފަހު ޑިފެންސް މިނިސްޓްރީގެ ނައިބު މޭޖާ ޖެނެރަލް (ރިޓަޔަޑް) އަރޫނާ ޖަޔަސޭކަރަ ވިދާޅުވީ މި ތަކެތި ހުރީ 14 ގޯންޏެއްގައި ބޯޓުތަކުގެ ތެރޭގައި ފޮރުވައިފަ އެވެ.