ފުރުސަތުގެ ބޭނުން ހިފައި ރިސޯޓް ތަރައްގީ ކުރަން ދިވެހި އާ މޫނުތަކެއް

ރާއްޖޭގެ ޓޫރިޒަމް މިއަދު ދުނިޔޭގެ ބްރޭންޑެއްގެ ގޮތުގައި އޮތުމުގައި އެންމެ އިސް ދައުރެއް އަދާކުރީ ދިވެހިންނެވެ. އޭރުގެ ދިވެހި ޒުވާނުންނެވެ. މިއަދު ޓޫރިޒަމް ބާނީގެ ގޮތުގައި ނަގާކިތަން ތިބި ފަރާތްތަކާއި ފަހުން ދުނިޔޭގެ މަޝްހޫރު ބްރޭންޑްތައް ގެނައި މީހުންނެވެ. އެ މީހުންނަކީ ބަރަވެލި ނާރާ ފަޅު ރަަށްތަށް ދުނިޔޭގެ ބްރޭންޑްތަކަށް ބަދަލުކޮށްލި މީހުންނެވެ. ފަޅުރަށްތަކުގެ ކަނު އަނދިރީގައި މަދިރީގެ އުނދަގުލުގައި ނިދައި، އެ ރަށްށުގައި އަގު ބޮޑު ކޮޓަރިތައް އެޅި އެވެ. އެންމެ ރުފިޔާއެއް ރާއްޖޭން ލިބެން ނެތް ނަމަވެސް ބޭރުން ފައިސާ ގެނެސްގެން ބިލިއަން ޑޮލަރުގެ އިންވެސްޓްމަންޓްތައް ހެދީ އެމީހުންނެވެ. އެ މީހުން އެ ދުވަހު ކުރި މަސައްކަތަށްފަހު އަނެއްކާ ވެސް މިވަނީ ދިވެހި އާ ކުންފުނިތަކެއް، ދިވެހި މޫނުތަކެއް ރިސޯޓް ތަރައްގީ ކުރަން ނުކުމެފަ އެވެ. ރިސޯޓްތައް ހަދަން ފަށާފައިވަނީ ކުދިއަދިމެދުފަންތީގެ ވިޔަފާރިން ފަށައި ކުރިއަރައިގެން ދިޔަ ވިޔަފާރިވެރިންނެވެ. 

ސަރުކާރުން ހުޅުވާލި ފުރުސަތުގެ ބޭނުން ހިފައި ރިސޯޓް އޯނަރުންނަށް ވާން ދިވެހި ކުންފުނިތަކެއް މިވަނީ އާ ރަށްތަކެއް ނަގާފަ އެވެ. މި ކުންފުނިތަކުގެ ތެރޭގައި ރާއްޖޭގެ އިމާރާތް ކުރުމުގެ ދާއިރާގައި މިހާރު ނަން މަޝްހޫރު ކުންފުނިތައް ހިމެނެ އެވެ. އަދި ރަަށު ޓޫރިޒަމް ނުވަތަ ގެސްޓްހައުސް ވިޔަފާރީގައި ކާމިޔާބު ބްރޭންޑްތައް ވެސް ހިމެނެ އެވެ. އަދި އިންޝުއަރެންސް ސިނާއަތާއި ފައިނޭންސް ދާއިރާގައި ނަން މަޝްހޫރު މޫނުތައް ވެސް ހިމެނ އެވެ. 

ޓޫރިޒަމް މިނިސްޓްރީގެ ރަސްމީ މައުލޫމާތުތަކު އެނގޭ ގޮތުގައި 2024 އަހަރު 24 އަށްވުރެ ގިނަ ފަރާތްތައް ވަނީ ރަަށް ތަަރައްގީ ކުރަން ހަވާލުކޮށްފަ އެވެ. މި ހަވާލުކުރި ފަރާތްތަކުގެ ތެރޭގައި އަލަށް ޓޫރިޒަމަށް ނުކުންނަން ފުރުސަތު ލިބުނު 100 ޕަސެންޓް ދިވެހި ކުންފުނިތައް ވެސް ހިމެނެ އެވެ. މި ކުންފުނިތަކުގެ ތެރޭގައި ހިމެނެނީ ؛ 

އެސްޖޭ ޕްރައިވެޓް ލިމިޓެޑަކީ ރާއްޖޭގެ އިމާރާތް ކުރުމުގެ ސިނާއަތުގައި މަޝްހޫރު ނަމެކެވެ. ކްލޯޒް ބިޑިންގެ އުސޫލުން ރިސޯޓް ތަރައްގީ ކުރަން ސަރުކާރުން ހުޅުވާލި ފުރުސަތެއްގައި އެސްޖޭ ޕްރައިވެޓް ލިމިޓެޑް ކުންފުނިން ނަގާފައިވަނީ ޅ. އަތޮޅު ވިހަފަރު ފިނޮޅެވެ. މި ކުންފުނީގެ ހިއްސާދާރުންގެ ގޮތުގައި ތިއްބަވަނީ މުހައްމަދު ޝާހިދު އާއި ޝާހިދު އިބްރާހިމް އެވެ. އެސްޖޭއަކީ އިމާރާތް ކުރުމުގެ ސިނާއަތުގެ ރިއަލްއެސްޓޭޓް އާއި ރިޓެއިލް ވިޔަފާރީގައި މިހާރު ފުޅާކޮށް މަސައްކަތް ކުރާ ކުންފުންޏެކެވެ.

ކ. މާފުށީގައި ގެސްޓްހައުސް ވިޔަފާރި ފުޅާ ދާއިރާއެއްގައި ކުރަމުން ގެންދާ ކާނި ހޮޓެލްސް ކުންފުނިން މި ކުންފުންޏަށް ރިސޯޓް ތަރައްގީ ކުރަނީ ކާނި ހޮޓެލް އެންޑް ރިސޯޓް ކުންފުނީގެ ފަރާތުންނެވެ.  މި ކުންފުނީގެ ބޯޑުގައި ތިއްބަވަނީ އަބްދުﷲ ނަޝީދު (ކާނި އަބްދު) އާއި އަނބިކަނބަކުން އައިމިނަތު އާސިމާ ސަލީމް އަދި ދެ ދަރިކަލުން ކަމަށްވާ މުހައްމަދު ނަބީލް އަބްދުﷲ އަދި އިސްމާއިލް ނަޒަލް އަބްދުﷲ އެވެ. ކާނި ކުންފުނިން ތަރައްގީ ކުރަމުން ގެންދަނީ ވ. އަތޮޅު ފަަޅެއްގައި ރިސޯޓް ތަރައްގީ ކުރުމުގެ މަޝްރޫއެކެވެ. 

އެރީނާ އެންމެންނަށް އެނގެނީ ގެސްޓްހައުސް ހިންގާ މަޝްހޫރު ކުންފުންޏެއްގެ ގޮތުގަ އެވެ. ކ. މާފުށީގައި އެންމެ ފުޅާކޮށް މި ވިޔަފާރިކުރާ އެއް ކުންފުނި ކަމަށްވާ އެރީނާއިން ތަރައްގީ ކުރަމުން ގެންދަނީ މާފުށި ކައިރީގައި އޮންނަ ފަޅެކެވެ. އެ ފަޅު ހިއްކައި ނިންމާލާފައިވާއިރު، މިހާރު ކުރަމުން ގެންދަނީ ރަށް ގްރީނަރީ ކުރުމުގެ މަސައްކަތްތާއި ކޮޓަރިތަކުގެ މަސައްކަތްތަކެވެ. މި ކުންފުނީގެ ހިއްސާދާރުން ތެރޭގައި ތިއްބަވަނީ ބުންޔާމީން އަހުމަދު އާއި ޒަމީރާ އަބްދުރައްޔާގު އެވެ. 

ދިވެހި އިންވެސްޓްމަންޓް ޕާޓްނާސް (ޑިޕް) އަކީ ރާއްޖޭގެ މާލީ އަދި ވިޔަފާރީގެ ދާއިރާގެ ފުންނާބުއުސް ގިނަ ފަރާތް ތަކެއް ހިމެނޭ ކުންފުންޏެކެވެ. މި ކުންފުނިން ރިސޯޓެއް ތަރައްގީ ކުރަން ނަގާފައިވަނީ ގއ. ބޭރުމައުއްޑޫ އެވެ. މި ކުންފުނީގެ ހިއްސާދާރުންގެ ގޮތުގައި ތިއްބަވަނީ އެލައިޑް އިންޝުއަރެންސުގެ އެމްޑީގެ މަގާމު ފުރުއްވި އަބްދުލް ވާހިދު ރައްޒާގު އާއި އަހުމަދު އަމީލް އެވެ. 

ލިއޯ ޓްރޭންޑިންއަކީ ރާއްޖޭގައި އަދި މި ސަރަހައްދުގެ ފެންވަރުންވެސް ފާހަގަކޮށްލެވޭ ލޮޖިސްޓިކް ކުންފުންޏެކެވެ. އަދި ބަރު މެޝިނަރީ ކުއްޔަށް ދޫކުރުމާއި، ކަނޑުމަގުން މުދާ އުފުލުން (ބާޖު އަދި ޓަގް ބޯޓު)، އަދި މުދާ އެރުވުމާއި ބޭލުމުގެ ހިދުމަތް ދޭ ކުންފުންޏެކެވެ. މީގެ އިތުރުން ވެސް ގިނަ ވިޔަފާރިތަކެއް ލިއޯއިން ކުރެ އެވެ. މި ކުންފުނިން ރިސޯޓް ތަރައްގީ ކުރަން ނަގާފައިވަނީ ބ. ގޮއިދޫ ފަރެވެ. މި ކުންފުނީގެ ބޯޑުގައި ތިއްބަވަނީ އަބްދުﷲ ސަވާދު އާއި އަނޫސާ ޒާހިރު އެވެ. 

ބައިސަން މޯލްޑިވްސް އަކީ ރާއްޖޭގެ އިމާރާތްކުރުމުގެ ސިނާޢަތުގައި ފާހަގަކޮށްލެވޭ، ވަރަށް ފުޅާދާއިރާއެއްގައި މަސައްކަތްކުރާ ކުންފުންޏެކެވެ. މިއީ ގިނަ އަހަރުތަކެއްގެ ތަޖުރިބާލިބިފައިވާ، އިތުބާރު ހޯދާފައިވާ ކުންފުންޏެކެވެ. ބައިސަން މަަޝްހޫރުވެފައިވަނީ ރާއްޖޭގެ ގިނަ ރިސޯޓްތަކެއްގެ އިމާރާތްކުރުމުގެ މަސައްކަތާއި، ރިނޮވޭޝަން މަސައްކަތްތަކުންނެވެ. ސަރުކާރުން އެންމެފަހުން ދޫކުރި ރަށްތަކަށް ކުރިމަތިލައި ބިޑް އުސޫލުން ބައިސަން އިން ނަގާފައިވަނީ ލ. ގަސްގަނޑު ފިނޮޅެވެ. 

ހެންޑީ ހޯލްޑިންގްސް އަކީ ރާއްޖޭގައި ވަރަށް ފުޅާދާއިރާއެއްގައި ވިޔަފާރިކުރާ، އަދި ހާއްސަކޮށް ޓޫރިޒަމާއި އިމާރާތްކުރުމުގެ ސާމާނު ފޯރުކޮށްދިނުމުގައި ފާހަގަކޮށްލެވޭ ކުންފުންޏެކެވެ. މި ކުންފުންޏަކީ ސަފާރީ އުޅަނދުތައް ނުވަތަ ލިވްއެބޯޑް  އޮޕަރޭޓްކުރުމުގައި ރާއްޖޭގެ ކުރީ ސަފުގައި ގުނާލެވޭ ކުންފުންޏެކެވެ. އެގޮތުން ހޭންޑީ ކްރޫޒާ ފަދަ މަޝްހޫރު ލަގްޒަރީ ސަފާރީތައް މި ކުންފުނިން ހިންގަ އެވެ. މިއީ މިހާރު މަޝްހޫރު ހޭންޑީ ވޯޓާ އުފައްދާ ކުންފުންޏެވެ. މި ކުންފުނިން ކްލޯޒް ބިޑިން އުސޫލުން ރިސޯޓެއް ތަރައްގީ ކުރަން ނަގާފައިވަނީ ހއ. ގޮވާފުށެއްޓެވެ. މި ކުންފުނީގެ ބޯޑުގައި ތިއްބަވަނީ ހަަސަން ހަލީމް އާއި ފާތުމަތު ޖީނާ މުހައްމަދު އެވެ.