އަންނަ މަހު ލަންޑަނުގައި އޮންނަ މުސްލިމް ޓްރެވަލް ޝޯއަށް އައިއެޗްޓީއޯ

ދުނިޔޭގެ ހަލާލް ފަތުރުވެރިކަމުގެ ބާޒާރުގައި ރާއްޖޭގެ ހިއްސާ ފުޅާކުރުމުގެ މަގުސަދުގައި، އަންނަ މަހު ލަންޑަންގައި ބާއްވާ 'މުސްލިމް ޓްރެވަލް ޝޯ' ގައި ރާއްޖެ ބައިވެރިވާނެކަން އިންޓަނޭޝަނަލް ހަލާލް ޓޫރިޒަމް އޮގަނައިޒޭޝަން (އައިއެޗްޓީއޯ) އިން ފުރުސަތު ހުޅުވާލައިފި އެވެ. 

ލަންޑަނުގެ އެކްސެލް އަންނަ މަހުގެ 7 އިން 8 އަށް ކުރިއަށްދާ މި ހަރަކާތަކީ ދުނިޔޭގެ އެންމެ ބޮޑު މުސްލިމް ދަތުރުފަތުރުގެ ހަރަކާތެވެ.

އައިއެޗްޓީއޯ އިން މި ފެއާއަށް ދަނީ ވިޒިޓް މޯލްޑިވްސް އާއި މަޓާޓޯ އަދި ބޯޓިންގ އެސޯސިއޭޝަން އަދި ނޭޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަންގެ އެންޑޯޒްމަންޓާއެކުގަ އެވެ.

މުސްލިމް ޓްރެވަލް ޝޯ - މި ހަރަކާތަކީ ހަލާލް ފަތުރުވެރިކަމުގެ ޚިދުމަތްތައް ފޯރުކޮށްދޭ ފަރާތްތަކާއި، އާންމު ފަތުރުވެރިން އެއް ތަނަކުން ބައްދަލުވުމަށް ވާނެ އެވެ. މި ފެއާއަށް އެވްރެޖުކޮށް ދުވާލަކު 20،000 އަށްވުރެ ގިނަ މީހުން ޒިޔާރަތްކުރާނެ ކަމަށް ބެލެވެ އެވެ.

މި ފެއާ އަށް ދުނިޔޭގެ އެކި ކަންކޮޅުތަކުން އެއާލައިންތަކާއި ރިސޯޓުތަކާއި ގައުމީ ފަތުރުވެރިކަމުގެ އިދާރާތައް ހިމެނޭހެން 200 އަށްވުރެ ގިނަ ފަރާތުން ބައިވެރިވާނެ އެވެ.

ތަފާސްހިސާބުތައް ދައްކާގޮތުގައި މުސްލިމް ފަތުރުވެރިކަމުގެ ބާޒާރު އަންނަނީ ވަރަށް ބޮޑަށް ފުޅާވަމުންނެވެ. މި ދާއިރާވަނީ 2024 ވަނަ އަހަރު 176 މިލިއަން މުސްލިމް ފަތުރުވެރިން ދަތުރުކޮށްފައިވާއިރު، 2030 އާ ހަމައަށް މި އަދަދު 245 މިލިއަނަށް އަރާނެ ކަމަށް ލަފާކުރެވެ އެވެ. އަދި މި ދާއިރާގެ ބާޒާރުގެ އަގު 2035 ވަނަ އަހަރާ ހަމައަށް 500 ބިލިއަން ޔޫ.އެސް ޑޮލަރަށް އަރާނެ ކަމަށް ބެލެވެ އެވެ.

ރާއްޖެއަށް އޮތް ފުރުސަތު - މި ހަރަކާތުގެ ސަބަބުން ރާއްޖޭގެ ރިސޯޓުތަކާއި، ގެސްޓްހައުސްތަކާއި، ސަފާރީތަކަކީ މުސްލިމް އާއިލާތަކަށް ބޭނުންވާ 'ހަލާލް-ފްރެންޑްލީ' ހިދުމަތްތައް ލިބޭ ތަންތަންކަން ދުނިޔެއަށް ދައްކާލުމަށް މަގުފަހިވާނެ އެވެ. 

ރާއްޖޭގެ ސްޓޭންޑުގައި ބައިވެރިވުމުގެ ފުރުސަތު މިހާރު ވަނީ ފަތުރުވެރިކަމުގެ ދާއިރާގެ ހިއްސާދާރުންނަށް ހުޅުވާލާފަ އެވެ. މި ފެއާގައި ބައިވެރިވާން ބޭނުންވާ ފަރާތްތަކުން އައިއެޗްޓީއޯގެ ވެބްސައިޓް މެދުވެރިކޮށް ނުވަތަ salaam@ihto.org އަށް އީމެއިލް ކުރުމަށް އެ ޖަމްއިއްޔާއިން އިލްތިމާސްކުރެ އެވެ.