ހިޔާގެ 8 ޓަވަރުގައި އިތުރު ލިފްޓު ހަރުކޮށް، އާންމުންނަށް ހުޅުވާލައިފި

ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ހިޔާ ޓަވަރުތަކުގައި އިތުރު ލިފްޓު ހަރުކުރުމަށް ކުރިއަށް ގެންދާ މަޝްރޫއުގެ ތެރެއިން އަށް ޓަވަރެއްގައި އިތުރު ލިފްޓް ހަރުކޮށް ނިންމާލައިފި އެވެ.

ހިޔާ ޓަވަރުތަކުގައި އިތުރު ލިފްޓު ހަރުކުރަން ހަވާލުކޮށްފައި ވަނީ އިނާގެ ޝެންޔަންގް ޔުއާން އިންޓެލެކްޗުއަލް ގުރޫޕާ އެވެ. މި މަޝްރޫއުގެ ދަށުން ހިޔާގެ ކޮންމެ ޓަވަރެއްގައި އިތުރު ދެ ލިފްޓު ހަރުކުރާނެ އެވެ.

އެގޮތުން ހިޔާގެ 16 ޓަވަރު ހުންނައިރު މި މަޝްރޫއު ނިމޭއިރު ޖުމްލަ 32 ލިފްޓު ހަރުކުރާނެ އެވެ. އެއީ ސްޓްރެޗާ އެރުވޭ ލިފްޓަކާއި އިތުރު ޕެސެންޖާ ލިފްޓެކެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނީ އެޗް1 އިން ފެށިގެން އެޗް8 ޓަވަރުގައި އިތުރު ލިފްޓު ހަރުކުރުމުގެ ހުރިހާ މަސައްކަތެއް ނިމިފައިވާ ކަމަށެވެ. އަދި އެ ލިފްޓުތައް މިހާރު އާންމުންނަށް ބޭނުންކުރެވޭނެހެން ހުޅުވާލާފައިވާ ކަމަށްވެސް ބުންޏެވެ.

މިހާރު ކުރިއަށް ދަނީ ޓަވަރު އެޗް14، އެޗް15 އަދި އެޗް16ގައި ލިފްޓުތައް ހަރުކުރުމުގެ މަސައްކަތެވެ. ދެން ހުރި ޓަވަރުތަކުގައި ކުރިއަށް ދަނީ ޓެސްޓިންގެ މަސައްކަތްތަކެވެ.

ބޮޑު އާބާދީއެއް ދިރިއުޅޭ ހިޔާ ޓަވަރުތަކުގައި ލިފްޓު ތޮއްޖެހި، ލިފްޓު ކައިރީ ބޮޑު ކިޔޫއެއް ހަދާފައި އަބަދުވެސް އޮވެ އެވެ. ހާއްސަ ގޮތެއްގައި ޕީކް ގަޑިތަކުގައި ލިފްޓުން ޖާގަ ހޯދަން އާންމުންނަށް ބޮޑެތި ދަތިތަކަކާ ދިމާވެ އެވެ.