އީރާނަށް ހަމަލާދޭން އިޒްރޭލުން ފުރުސަތަކަށް ދަނީ ބަލަމުން : ތުރުކީ ހާރިޖީވަޒީރު

މެދުއިރުމަތީގައި އޮތް ނުތަނަވަސްކަން އިންތިހާ އަށް ބޮޑުވެފައިވާ މި ދަނޑިވަޅުގައި، އިޒްރޭލުން އީރާނަށް ހަމަލާދޭނެ ފުރުސަތަކަށް ބަލަމުންދާ ކަމަށް ތުރުކީގެ ޚާރިޖީ ވަޒީރު ހާކާން ފިދާން އިންޒާރު ކުރައްވައިފި އެވެ.

ތުރުކީގެ އެންޓީވީ އަށް ދެއްވި އިންޓަވިއުއެއްގައި ފިދާން ވިދާޅުވީ އިޒްރޭލުން އީރާނަށް ހަމަލާދީފިނަމަ މުޅި ސަރަހައްދުގެ ހަމަޖެހުން ގެއްލިގެންދާނެ ކަމަށެވެ. 

"އިޒްރޭލުން އޮތީ އީރާނަށް ހަމަލާދޭނެ ފުރުސަތަކަށް ބަލަބަލައި. އަޅުގަނޑު އުންމީދު ކުރަނީ އެމީހުން ސުލްހައިގެ މަގެއް ހޯދުން،" ފިދާން ވިދާޅުވި އެވެ.

ފިދާން އިތުރަށް ހާމަކުރެއްވި ގޮތުގައި ދާދި ފަހުން ތެހެރާނަށް ކުރެއްވި ދަތުރުފުޅުގައި އީރާނުގެ އޮފިޝަލުންނާ ބައްދަލުކުރައްވައި، މި ނުރައްކަލާ ބެހޭ ހުރިހާ މައުލޫމާތެއް ހިއްސާކުރައްވާފައިވާނެއެވެ. "އެކުވެރިން އަބަދު ވެސް ބުނާނީ ހިތި ހަގީގަތް،" އޭނާ ވިދާޅުވި އެވެ.

އީރާނުގެ ސަރުކާރުގެ މަތީ ފަންތީގެ އޮފިޝަލަކު ރޮއިޓާސް އަށް މައުލޫމާތު ދެއްވަމުން ވިދާޅުވީ އީރާނަށް ދެވޭ ކޮންމެ ހަމަލާއެއް ބަލާނީ "ފުރިހަމަ ހަނގުރާމައެއް" އިޢުލާން ކުރުން ކަމަށެވެ. އަދި އެކަމަށް އީރާނުގެ އަސްކަރިއްޔާ އޮތީ އެންމެ މަތީ ފަންތީގެ ތައްޔާރީ ހާލަތެއްގައި ކަމަށް ވެސް އޭނާ ވިދާޅުވި އެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް އަމާޒުކޮށް "އަރްމާޑާ" (މަނަވަރުތަކުގެ ބޮޑު ލަޝްކަރެއް) ގަލްފް ސަރަހައްދަށް ފޮނުވާފައިވާ ކަމަށް ވިދާޅުވެފަ އެވެ. ރިޕޯޓްތައް ބުނާގޮތުން، އެމެރިކާގެ މަތިންދާ ބޯޓު އުފުލާ މަނަވަރު 'ޔޫއެސްއެސް އަބްރަހަމް ލިންކަން' އާއި އޭގެ ފްލީޓް މިހާރު ދަނީ މެދުއިރުމައްޗަށް މިސްރާބު ޖަހަމުންނެވެ.

އީރާނުގެ އޮފިޝަލް ވިދާޅުވީ، އެމެރިކާއިން އީރާނުގެ އިސްތިގުލާލަށް އަރައިގެންފިނަމަ، ދެވޭނެ އެންމެ ހަރުކަށި ރައްދު ދޭނެ ކަމަށެވެ.