ވިލުންތެރި، ހަމަހަމަ ގައުމެއް ބިނާކުރުމުގެ ވިންދަށް ތައުލީމް ހެދިއްޖެ: ރައީސް
ފާއިތުވި ދެ އަހަރުގެ ތެރޭގައި 6،000 އަށްވުރެ ގިނަ ދަރިވަރުން ސަރުކާރުގެ ފުރަތަމަ ޑިގްރީ ކޯހުގެ ދަށުން ދަސްވެނިވެފައިާއިރު، މަތީ ތައުލީމުގެ ލޯނަށް ވެސް އެއް ބިލިއަނަށް ވުރެ ގިނަ ރުފިޔާ ކަނޑައަޅާފައިވާކަން ރައީސް ފާހަގަކުރެއްވި
ވިލުންތެރި، ހަމަހަމަ އަދި އުފެއްދުންތެރި ގައުމެއް ބިނާކުރުމުގެ ވިންދަކީ ތައުލީމްކަމަށް ހެދުމަށް މި ސަރުކާރުން ކަނޑައެޅި އަމާޒު ހާސިލްވަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބައިނަލްއަގުވާމީގޮތުން ފާހަގަކުރާ ތައުލީމީ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، ދެމެހެއްޓެނެވި ތަރައްގީ އާއި ދުނިޔޭގެ ތަރައްގީގެ ބިންގަލަކީ ތައުލީމު ކަމަށެވެ.
ރާއްޖޭގައި ވެސް ގައުމީ ތަރައްގީގެ ވިންދުގެ ގޮތުގައި ތައުލީމް އިސްކޮށްފައިވާ ކަމަށް އެ މަނިކުފާނު ވިދާޅުވި އެވެ.
މިގޮތުން، ފާއިތުވި ދެ އަހަރުގެ ތެރޭގައި 6،000 އަށްވުރެ ގިނަ ދަރިވަރުން ސަރުކާރުގެ ފުރަތަމަ ޑިގްރީ ކޯހުގެ ދަށުން ދަސްވެނިވެފައިާއިރު، މަތީ ތައުލީމުގެ ލޯނަށް ވެސް އެއް ބިލިއަނަށް ވުރެ ގިނަ ރުފިޔާ ކަނޑައަޅާފައިވާކަން ރައީސް ފާހަގަކުރެއްވި އެވެ.
ދަރިވަރުންގެ ތައުލީމަށް އިންވެސްޓުކޮށް، އެ ކުދީންނަށް ތައުލީމީ ފުރުސަތުތައް ފުޅާކޮށްގެން މުސްތަގުބަލު ބައްޓަންކުރުމުގެ އިތުރުން ފާގަތި، ހަމަހަމަ އަދި ހަރުދަނާ ގައުމެއް ބިނާ ކުރެވި، އަމިއްލަ ހައިސިއްޔަތުން ކޮންމެ ދަރިވަރަކަށް ވެސް ކުރިއެރުވުމުގެ ފުރުސަތު ލިބިގެންދާ ކަމަށް އެ މަނިކުފާނު ވިދާޅުވި އެވެ.
ކޮމެންޓް
Republic of Maldives