ހެލިކޮޕްޓަރުގެ ހިދުމަތް ދޭނެ ބަޔަކު ހޯދަން އަނެއްކާވެސް އިއުލާނު ކޮށްފި
އެ އިއުލާނުގައިވާ ގޮތުގައި، ރިކުއެސްޓް ފޯ ޕްރޮޕޯސަލް (އާރުއެފްޕީ) ހުށަހެޅޭނެ އެންމެ ފަހު ތާރީހަކީ އަންނަ މާޗް މަހުގެ 25 ވަނަ ދުވަހެވެ.
ރާއްޖޭގައި ހެލިކޮޕްޓަރުގެ ހިދުމަތް ދިނުމަށް ޝައުގުވެރިވާ ބަޔަކު ހޯދަން ޓްރާންސްޕޯޓް މިނިސްޓްރީން އަނެއްކާ ވެސް އިއުލާންކޮށްފި އެވެ.
މިއީ ހެލިކޮޕްޓަރުގެ ހިދުމަތް ދޭނެ ބަޔަކު ހޯދުމަށް ޓްރާންސްޕޯޓް މިނިސްޓްރީން އިއުލާނުކުރި ތިންވަނަ ފަހަރެވެ.
އެ ހިދުމަތް ދިނުމަށް ކުރި އިއުލާނުގައި ބުނެފައި ވަނީ، ހެލިކޮޕްޓަރުގައި އެއާ އެމްބިއުލާންސްގެ ހިދުމަތް ދިނުމާއި، ސާޗް އެންޑް ރެސްކިއު އޮޕަރޭޝަންތަކުގައި އެހީވުމުގެ އިތުރުން ވިޔަފާރިގެ އުސޫލުން ފަސިންޖަރުން އުފުލުމަށްޓަކައި ޓޫރިޒަމްގެ ދާއިރާގައި ހެލިކޮޕްޓަރު ބޭނުން ކުރުމަށް 10 އަހަރުގެ އެކްސްކުލޫސިވިޓީއެއް ލިބޭނެ ކަމަށެވެ.
އަދި އެ މުއްދަތުގައި އެހެން އެއްވެސް ކުންފުންޏަކަށް އެ ހިދުމަތް ދިނުމުގެ ހުއްދަ ނުދޭނެ ކަމަށް އިއުލާނުގައި ވެ އެވެ.
އެ އިއުލާނުގައިވާ ގޮތުގައި، ރިކުއެސްޓް ފޯ ޕްރޮޕޯސަލް (އާރުއެފްޕީ) ހުށަހެޅޭނެ އެންމެ ފަހު ތާރީހަކީ އަންނަ މާޗް މަހުގެ 25 ވަނަ ދުވަހެވެ.
އެ އާރުއެފްޕީގައި ބުނީ ހިދުމަތް ދިނުމަށް ހޮވާ ކުންފުނިން މަހަކު 80-150 ގަޑިއިރު އެއްވެސް އަގަކާ ނުލާ މެޑިކަލް އަދި ސާޗު އެންޑް ރެސްކިޔު އޮޕަރޭޝަންތަކަށް ހިދުމަތް ދޭންވާނެ ކަމަށެވެ. އަދި ކުއްލި ހާލަތްތަކުގައި އަބަދުވެސް ހެލިކޮޕްޓަރު އޮޕަރޭޓް ކުރަން ތައްޔާރަށް އޮންނަން ވާނެ ކަމަށެވެ.
މި ހިދުމަތް ދޭނެ ބަޔަކު ހޯދަން މިދިޔަ އަހަރުގެ އޮގަސްޓް އަދި ޑިސެމްބަރު މަހުވެސް ހުޅުވައިލި އެވެ. ނަމަވެސް ހިދުމަތް ދޭނެ ބަޔަކު ނުވި އެވެ.
ކޮމެންޓް
Republic of Maldives