ރާއްޖޭގައި ޓޫރިސްޓުން މަޑުކުރާ މުއްދަތު މިދިޔަ އަހަރަށްވުރެ އިތުރު ވެއްޖެ

ރާއްޖެއަށް ޒިޔާރަތްކުރާ ޓޫރިސްޓުން ރާއްޖޭގައި ހޭދަކުރާ މުއްދަތު މިދިޔަ އަހަރާ އަޅާބަލާއިރު މިއަހަރުގެ މިހާތަނަށް އިތުރުވެފައިވާ ކަމަށް ޓޫރިޒަމް މިނިސްޓްރީން ބުނެފި އެވެ. 

ޓޫރިޒަމް ތަފާސް ހިސާބުތައް ދައްކާ ގޮތުން ޖެނުއަރީ މަހުގެ ފުރަތަމަ 19 ދުވަހު ފަތުރުވެރިން ރާއްޖޭގައި އެވްރެޖްކޮށް މަޑުކޮށްފައިވަނީ 8.0 ދުވަހު އެވެ. މިއީ މިދިޔަ ތިން އަހަރާ އަޅާކިޔާނަމަވެސް އިތުރުވުމެކެވެ. 

މަޑުކުރާ މުއްދަތުގެ އިތުރުން، ރާއްޖެއަށް ޒިޔާރަތްކުރާ ފަތުރުވެރިންގެ ޖުމްލަ އަދަދުވެސް ވަނީ މިދިޔަ އަހަރާ އަޅާބަލާއިރު ވަރަށް ބޮޑަށް އިތުރުވެފައެވެ. މި އަހަރު ވަނީ މިދިޔަ އަހަރާ އަޅާކިޔާނަމަ 13 ޕަސެންޓުގެ އިތުރުވުމެއް އައިސްފަ އެވެ. 

ޓޫރިސްޓުން ރާއްޖޭގައި ހޭދަކުރާ މުއްދަތު އިތުރުވުމަކީ ރާއްޖޭގެ އިގްތިސާދަށް ލިބޭ ބޮޑު ކުރިއެރުމެކެވެ. ފަތުރުވެރިން ގިނަ ދުވަހު މަޑުކުރި ވަރަކަށް ރިސޯޓުތަކާއި ގެސްޓްހައުސްތަކުގެ އޮކިއުޕެންސީ އިތުރުވެ، ފަތުރުވެރިކަމުގެ ދާއިރާއިން ލިބޭ އާމްދަނީ އިތުރުވެގެންދެއެވެ. ހާއްސަކޮށް އިޓަލީ، ރަޝިޔާ އަދި އިނގިރޭސިވިލާތް ފަދަ ޔޫރަޕްގެ މާކެޓްތަކުން އަންނަ ޓޫރިސްޓުން ގިނަ ދުވަހު މަޑުކުރާކަން މިނިސްޓްރީގެ މައުލޫމާތުތަކުން އެނގެ އެވެ. 

ރަޝިޔާ ޓޫރިސްޓުންނަކީ އާންމުކޮށް ރާއްޖޭގައި އެންމެ ގިނަ ދުވަސް ހޭދަކުރާ އެއް ބައެކެވެ. އެވްރެޖްކޮށް 9.0 އާއި 10.5 ދުވަހާ  ދެމެދު ރާއްޖޭގެ ޗުއްޓީގައި ތިބެ އެވެ. އަދި ރަޝިޔާގެ ޓޫރިސްޓުން ގިނައިން ޗުއްޓީ ހޭދަކުރަނީ ލަގްޒަރީ ރިސޯޓުތަކުގަ އެވެ. އަދި އެ މީހުންގެ ދަތުރުތައް އާންމުކޮށް ދިގުލައިގެންދެ އެވެ. އަދި އިޓަލީ މީހުން އެވްރެޖުކޮށް 7.5 އާއި 8.5 ދުވަހާ ދެމެދު މަޑުކުރެ އެވެ. އިޓަލީ މީހުން އާންމުކޮށް ރާއްޖެ އަންނަނީ 7 ރޭގެ ޕެކޭޖުތަކުގަ އެވެ. މިއަހަރުގެ ޖެނުއަރީ މަހުގެ މިހާތަނަށް އިޓަލީން 17,994 ޓޫރިސްޓުން ވަނީ ޒިޔާރަތްކޮށްފަ އެވެ. އަދި ޗައިނާއިން އެވްރެޖްކޮށް 5.5 އާއި 6.5 ދުވަހާ ދެމެދު މަޑުކުރެ އެވެ. އަދި ޔޫރަޕްގެ މީހުންނާ އަޅާބަލާއިރު ޗައިނާ ޓޫރިސްޓުން ރާއްޖޭގައި ހޭދަކުރާ މުއްދަތު ކުރެވެ. ނަމަވެސް، ޗައިނާގެ ޓޫރިސްޓުން އަންނަ މިންވަރު މިއަހަރު ވަނީ ވަރަށް ބޮޑަށް އިތުރުވެފައެވެ. މިހާތަނަށް 10,751 ޓޫރިސްޓުން އައިސްފައިވެ އެވެ. 

ތިބޭ މުއްދަތު އިތުރުވުމުގެ ފައިދާ - ޓޫރިސްޓުން ރާއްޖޭގައި މަޑުކުރާ މުއްދަތު ނުވަަތަ ޑިއުރޭޝަން އޮފް ސްޓޭ އިތުރުވުމަކީ، ރާއްޖެއަށް އަންނަ ޓޫރިސްޓުންގެ އަދަދު އިތުރުވުމާ އެއްވަރަށް، ނުވަތަ އެއަށްވުރެވެސް ބޮޑަށް އިގްތިސޯދީ ފައިދާ ލިބޭނެ ކަމެކެވެ. މީގެ ސަބަބުން ފަތުރުވެރިކަމުގެ އާމްދަނީ އިތުރުވެ އެވެ. ކޮންމެ އިތުރު ދުވަހަކީ ކެއިންބުއިމާއި، ސްޕާ އަދި އެކި ކަހަލަ ވޯޓާ ސްޕޯޓްސް ފަދަ ހިދުމަތްތަކަށް ފަތުރުވެރިޔާ ކުރާ ހޭދަ އިތުރުވާނެ ދުވަހެކެވެ. އަދި މީގެ ސަބަބުން ޓޫރިސްޓުން ކުރާ ކޮންމެ ޚަރަދަކުން ޖީއެސްޓީ ކޮންމެ ދުވަހަކަށް ގްރީން ޓެކްސް ދައުލަތަށް ލިބެ އެވެ. އަދި އޮކިއުޕެންސީ ރޭޓް މަތިވުން ރިސޯޓުތަކާއި ގެސްޓްހައުސްތަކުގެ ކޮޓަރިތައް ފުރިފައި ހުންނަ މިންވަރު މިއާއެކު މަތިވެ އެވެ. ޓޫރިސްޓުން އަންނަ އަދަދު އިތުރު ނުވި ނަމަވެސް، ތިބޭ މުއްދަތު އިތުރުވުމުން "ބެޑް ނައިޓްސް" ނުވަތަ ޓޫރިސްޓުން ހޭދަކުރާ ރޭގެ އަދަދު އިތުރުވެ، ވިޔަފާރިތަކަށް ފައިދާވެ އެވެ. މި މުއްދަތުގައި ޖުމްލަ ބެޑްނައިޓްސް ގާތްގަނޑަކަށް 1,084,440 މިލިއަނަށްވުރެ އިތުރެވެ. މިހާތަނަށް ޓޫރިޒަމަށް އާމްދަނީގެ ގޮތުގައި 600 މިލިއަން ޑޮލަރު ލިބިފައިވާނެ ކަމަށް އަންދާޒާ ކުރެވެ އެވެ.