ދިވެއްސަކު ކަނޑުއަޑީގައި 450 ކިލޯމީޓަރުގެ ތާރީހީ ދަތުރެއް ކުރަނީ

ރާއްޖޭގެ ކަނޑުއަޑީގެ ރީތިކަން ދުނިޔެއަށް އިޝްތިހާރު ކުރުމަށާއި ކަނޑުއަޑީގައި ދިގު ރާސްތާއެއް ކަޑައްތުކޮށް، އާ ރެކޯޑެއް ގާއިމުކުރުމަށް ހިންގާ ތާރީހީ ހަރަކާތް "އެކްރޮސް މޯލްޑިވްސް" ރަސްމީކޮށް އިފްތިތާހުކޮށްފި އެވެ.

މި ހަރަކާތަކީ މަޝްހޫރު ދިވެހި ޑައިވަރު ޝަފްރާޒް ނައީމް އިސްވެ ހުރެ، އަންނަ ހުކުރު ދުވަހުން ފެށިގެން ފެށުމަށް ހަމަޖެހިފައިވާ އާދަޔާހިލާފު ދަތުރެކެވެ. ތާރީހީ ދަތުރު ފެށުމަށް ހަމަޖެހިފައިވަނީ ރާއްޖޭގެ އުތުރުން ހއ. އަތޮޅުންނެވެ. އެތަނުން ފެށިގެން ދެކުނަށް، ރާއްޖޭގެ އެކި އަތޮޅުތަކުގެ ކަނޑުގެ ސަރަހައްދުތައް ކަޑަތުކުރަމުން ދަތުރު ކުރިއަށްދާނެ އެވެ.

މަގުސަދާއި މުހިންމުކަން - މި ދަތުރުގެ މައިގަނޑު ބޭނުމަކީ ރާއްޖެއަކީ ކަނޑުއަޑީގެ ތަފާތު ތަޖުރިބާތައް ކުރަން ބޭނުންވާ ފަތުރުވެރިންނަށް ދުނިޔޭގެ ފެންވަރުގެ މަންޒިލެއްކަން އިޝްތިހާރުކުރުމެވެ. މީގެ އިތުރުން ދިވެހިންނާއި ކަނޑާ އޮތް ގާތް ގުޅުމާއި ސަގާފީ އަގުތައް މި ހަރަކާތުގެ ތެރެއިން ދައްކުވައިދޭނެ އެވެ.

މި 15 ދުވަހުގެ މި ދަތުރުގެ ތެރޭގައި ޝަފްރާޒް ނައީމް މަޑުކުރުމަށް ރޭވިފައިވާ ބައެއް މުހިންމު މަންޒިލްތަކަކީ އުތުރުގެ އަތޮޅުން ފުރަތަމަ ފިޔަވަހީގައި ހއ، ހދ، އަދި ށ. އަތޮޅުގެ ކަނޑުއަޑި އެވެ. އަދި މެދު ރާއްޖެތެރެއިން ދަތުރުގެ މެދުތެރެއިން މާލެ ސަރަހައްދުގެ ރަށްތަކަށް ކައިރިކޮށް، ޕާޓްނަރުންނާއި ކައުންސިލްތަކާ ބައްދަލުކުރާނެ އެވެ. އަދި 450 ކިލޯމީޓަރު ހަމަކޮށް، ދަތުރު ނިންމާލުމަށް ރޭވިފައިވަނީ ކަނޑައެޅިފައިވާ ވަކި ރަށަކަށެވެ.

މި ތާރީހީ ދަތުރުގެ ޑިޖިޓަލް ޕާޓްނަރެއްގެ ގޮތުގައި އުރީދޫ މޯލްޑިވްސް ހަމަޖެހިފައިވާއިރު، ދަތުރުގެ ތެރެއިން އެކި ރަށްރަށުގެ ކައުންސިލްތަކާއި ޕާޓްނަރުންގެ އެހީތެރިކަމާއެކު ޝަފްރާޒް ބައެއް ރަށްރަށުގައި މަޑުކުރުމަށް ވަނީ ހަމަޖެހިފައެވެ. މީގެ ސަބަބުން ރަށްރަށުގެ މެހެމާންދާރީއާއި ދިވެހިވަންތަކަން ވެސް މި ދަތުރުގެ ތެރެއިން ފެނިގެންދާނެ އެވެ.

މި ދަތުރުގައި އެންމެ މުހިންމު ދައުރެއް އަދާކުރަނީ 'ޑައިވާ ޕްރޮޕަލްޝަން ވެހިކަލް' އެވެ. މިއީ ކަނޑުއަޑީގައި ހއްސަ މެޝިނެކެވެ. މި ބޭނުން ކުރުމުން ވަރުބަލިނުވެ ފަސޭހައިން ދަތުރު ކުރެވެ އެވެ.  "އަންޑަވޯޓާ ސްކޫޓަރު" އެކެވެ. މި އާލާތުގެ އެހީގައި ޝަފްރާޒަށް 90 ގަޑިއިރަށްވުރެ ގިނަ ވަގުތު ކަނޑުއަޑީގައި އުޅެވޭނެ އެވެ.