ޓެކުހަށް މަކަރު ހެދިކަމުގެ ތުހުމަތުގައި ޑރ. އިކްލީލާއި ޑރ. އަލީ ލަތީފަށް ދައުވާކުރަނީ

ކޮވިޑް-19ގެ ބަލިމަޑުކަމުގެ ތެރޭގައި ފުޅާދާއިރާއެއްގައި ޕީސީއާރް ޓެސްޓުގެ ހިދުމަތް ދިން ޕައިނިއާ މޯލްޑިވްސް އާއި އައިލެންޑް ހެލްތު ސޮލިއުޝަންސް އިން ޓެކުހަށް މަކަރު ހެދި މައްސަލައިގައި އެ ދެ ކުންފުންޏަށާއި، ޑރ. އަލީ އަބްދުﷲ ލަތީފާއި ޑރ. އިކްލީލް ޝަރީފަށް ދައުވާ ކުރުމަށް ޕްރޮސެކިއުޓާ ޖެނެރަލް އޮފީސް (ޕީޖީ) އަށް ފޮނުވައިފި އެވެ.

މީރާއިން މިއަދު ނެރުނު ބަޔާނެއްގައި ބުނީ، ޓެކްސްއަށް މަކަރު ހެދުމުގެ ތުހުމަތުގައި ދައުވާކުރަން ފޮނުވި ޑރ. އިކްލީލަކީ ދެ ކުންފުނީގައިވެސް ހިމެނޭ ޑިރެކްޓަރެއް ކަމަށާއި، ޑރ. އަލީ ލަތީފަކީ އައިލެންޑް ހެލްތު ސޮލިއުޝަންގެ ޑިރެކްޓަރެއް ކަމަށެވެ.

މީރާއިން ބުނީ، ކޮވިޑްގެ ދުވަސްވަރު ޕީސީއާރު ޓެސްޓިންގެ ހިދުމަތް ދިނުމުގައި އެންމެ އިސްކޮށް އެ ދެ ކުންފުނިން ހަރަކާތްތެވެފައިވާއިރު، އެ ތަންތަނުން މީރާއަށް ހުށަހެޅި އިންކަމް ޓެކްސްގެ ބަޔާނުގައި، ޓެކްސް ނެގޭ އާމްދަނީ ވަރަށް ބޮޑަށް ދަށްކޮށްގެން ހުށަހަޅާފައިވާކަން ފާހަގަވެފައިވާ ކަމަށެވެ.

އެގޮތުން 2020، 2021 އަދި 2022 އަށް، އައިލެންޑް ހެލްތު ސޮލިއުޝަންސް އިން ހުށަހެޅި ބަޔާންތަކުގައި 31.9 މިލިއަން ރުފިޔާގެ ޓެކްސް ނެގޭ އާމްދަނީ ހިމަނާފައެއް ނުވެ އެވެ. އަދި 2020 އަދި 2021 އަށް ޕައިނިއާ މޯލްޑިވްސްއިން ހުށަހެޅި ބަޔާންތަކުގައި 102.7 މިލިއަން ރުފިޔާގެ ޓެކްސް ނެގޭ އާމްދަނީ ހިމަނާފައި ނުވާކަން މީރާއިން ފާހަގަކޮށްފައިވެ އެވެ.

މީރާއިން ވަނީ އެކަމާ ގުޅިގެން ކުރިއަށްގެންދިޔަ އޮޑިޓުތަކުގައި، އައިލެންޑް ހެލްތު ސޮލިއުޝަންސްގެ މައްޗަށް ޖުމްލަ 4.3 މިލިއަން ރުފިޔާ އަދި ޕައިނިއާ މޯލްޑިވްސްގެ މައްޗަށް 23.7 މިލިއަން ރުފިޔާ އިތުރަށް ދައްކަންޖެހޭ ޓެކުހުގެ ގޮތުގައި ކަނޑައަޅައި، އެ ޓެކްސް އެ އިދާރާއަށް ދައްކަން އަންގާފަ އެވެ.

ކޮވިޑް ކޮންޓްރޯލްކުރުމަށް އޭރު އުފެއްދި ޓެކްނިކަލް އެޑްވައިޒަރީ ޓީމް (ޓެގް)ގައި އިސްކޮށް ހުންނެވި ޑރ. ލަތީފްގެ މައްޗަށް ވިޑް ޓެސްޓު ހެދުމުގެ އެހެން މައްސަލައަކާ ގުޅިގެން ވެސް ދައުވާ ކުރުމަށް ވަނީ ފޮނުވާފަ އެވެ.