ޔޫކޭ ވެސް ކުޑަކުދިން ސޯޝަލް މީޑިއާ ބޭނުން ކުރުން މަނާ ކުރަން ތައްޔާރު ވަނީ

ކުޑަކުދިން ސޯޝަލް މީޑިއާގެ ނުރައްކާތަކުން ސަލާމަތްކުރުމަށްޓަކައި، އޮސްޓްރޭލިއާ އިން މިހާރު އަމަލުކުރަމުންދާ ފަދަ ހަރުކަށި އުސޫލެއް ތައާރަފްކުރުމަށް އިނގިރޭސިވިލާތުގެ ސަރުކާރުން މަޝްވަރާ ފަށައިފި އެވެ.

ހޯމަ ދުވަހު ޔޫކޭ ސަރުކާރުން ނެރުނު ބަޔާނެއްގައިވާ ގޮތުން، ކުޑަކުދިން ސޯޝަލް މީޑިއާ ބޭނުންކުރުން މަނާކުރުމަކީ ކިހާވަރެއްގެ ނަތީޖާއެއް ނުކުންނާނެ ކަމެއް ތޯ ބެލުމަށް ދުނިޔޭގެ އެކި ގައުމުތަކުން ހޯދުންތައް އެއްކުރުމަށް ވަނީ ނިންމާފަ އެވެ.

ދުނިޔޭގައި ފުރަތަމަ ފަހަރަށް 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރި ގައުމަކީ އޮސްޓްރޭލިއާ އެވެ. ޔޫކޭގެ ވަޒީރުން އޮސްޓްރޭލިއާއަށް ޒިޔާރަތްކޮށް، އެ ޤައުމުން އެކަން ތަންފީޒުކުރާ ގޮތް ބަލައި، އެއިން ދަސްކުރަންޖެހޭ ކަންކަން ދަސްކުރުމަށް ވަނީ ހަމަޖެހިފަ އެވެ.

ޔޫކޭ ސަރުކާރުގެ މި ނިންމުން އައިސްފައިވަނީ އޭއައި ބޭނުންކޮށްގެން އުފައްދާ ބަދުއަހްލާގީ ތަސްވީރުތަކުގެ މައްސަލަ ދުނިޔޭގައި ބޮޑުވެފައިވާ ދަނޑިވަޅެއްގައެ އަދި ހާއްސަކޮށް، އޭއައި ބޭނުންކޮށްގެން ކުޑަކުދިންގެ ނުދޭ ފޮޓޯ އުފެއްދުން ހުއްޓުވުމަށް ޔޫކޭ އިން ވަނީ ހަރުކަށި ފިޔަވަޅުތަކެއް އެޅުމަށް ވެސް ނިންމާފަ އެވެ.

އޮސްޓްރޭލިއާގެ ގާނޫނު ބުނާގޮތުން 16 އަހަރުން ދަށުގެ ކުދިންނަށް ސޯޝަލް މީޑިއާ އެކައުންޓް ހެދުމާއި ބޭނުންކުރުން މިހާރު ވަނީ މަނާކޮށްފަ އެވެ. މީގެ ތެރޭގައި އެކްސް އާއި ޓިކްޓޮކް، އިންސްޓަގްރާމް އަދި ފޭސްބުކް ފަދަ ޕްލެޓްފޯމްތައް ހިމެނެ އެވެ.

މި ގާނޫނުގެ އެންމެ ތަފާތު ސިފައަކީ ގާނޫނާ ހިލާފުވެގެން ކުޑަކުދިންނަށް ނުވަތަ ބެލެނިވެރިންނަށް އަދަބު ނުދޭކަމެވެ. އޭގެ ބަދަލުގައި ބޮޑެތި ޖޫރިމަނާތަކެއް ކުޑަކުދިން އެކައުންޓް ހެދުން ހުއްޓުވުމަށް އެކަށީގެންވާ ފިޔަވަޅު ނާޅާ ސޯޝަލް މީޑިއާ ކުންފުނިތައް 50 މިލިއަން އޮސްޓްރޭލިއަން ޑޮލަރާ (ގާތްގަނޑަކަށް 32 މިލިއަން ޔޫއެސް ޑޮލަރު) ހަމައަށް ޖޫރިމަނާ ކުރެވޭނެ އެވެ. އަދި ކުންފުނިތަކުން އުމުރު ކަށަވަރު ކުރުމަށް ބަޔޮމެޓްރިކްސް ނުވަތަ ސަރުކާރުން ގަބޫލުކުރާ އައިޑީ ބޭނުންކޮށްގެން އުމުރު ޔަގީންކުރާނެ ވަރުގަދަ ނިޒާމެއް ގާއިމްކުރަން ޖެހެ އެވެ.