އުވާލަން އުޅުނު ޑިމޮކްރެޓްސްއިން ކައުންސިލް އިންތިހާބަށް ނުކުންނަނީ

އަންނަ އޭޕްރީލް މަހުގެ 4 ވަނަ ދުވަހު ބާއްވާ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބުގައި ދަ ޑިމޮކްރެޓްސްއިން ވާދަކުރަން ނިންމައިފި އެވެ.

ޑިމޮކްރެޓްސްއިން ނެރުނު ބަޔާނެއްގައި ބުނެފައިވަނީ އެ ޕާޓީގެ އިންޓެރިމް ކޮމިޓީއިން އިލެކްޝަންސް ކޮމިޝަނާ ބައްދަލުކޮށް، މައުލޫމާތު ސާފުކޮށްފައިވާ ކަމަށެވެ.

އެހެންކަމުން، ޑިމޮކްރެޓްސްގެ ޓިކެޓުގައި ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރަން ބޭނުންވާ ދަ ޑިމޮކްރެޓްސްގެ މެމްބަރުންނަށް އެ ފުރުސަތު ހުޅުވާލެވިފައިވާ ކަމަށް އެޕާޓީން ބުންޏެވެ.

އަދި، ޑިމޮކެރްޓްސްގެ ނަމުގައި އިލެކްޝަންސް ކޮމިޝަންގެ ރަސްމީ ޕޯޓަލް މެދުވެރިކޮށް ކެންޑިޑެސީ ހުށަހެޅުމުން، އެ ކެންޑިޑޭޓަކު އެ ޕާޓީން އެންޑޯޒްކޮށްދޭނެ ކަމަށް އެޕާޓީންބުނެފައިވެ އެވެ.

ކައުންސިލް އިންތިހާބުގައި ޑިމޮކްރެޓްސްއިން ވާދަކުރަން ނިންމިއިރު، އެ ޕާޓީ އުވާލުމަށް މިދިޔަ އަހަރުގެ ޖޫން މަހުގެ ތެރޭގައި އޮތީ ނިންމާފަ އެވެ. ޕާޓީ އުވައިލުމަށް އޭރު ގަރާރެއްވެސް ފާސްކުރި އެވެ. އަދި ރައީސް މުހައްމަދު ނަޝީދު ހިމެނޭހެން އެ ޕާޓީގައި އިސްކޮށް އުޅުއްވި ގިނަ ބޭފުޅުން ވަނީ އެނބުރި އެމްޑީޕީއާ ގުޅިވަޑައިގެންފަ އެވެ.

ޑިމޮކްރެޓްސްއިން ވަނީ ރިޔާސީ އިންތިހާބާއި ރައްޔިތުންގެ މަޖިލީސް އިންތިހާބުގައިވެސް ވާދަކޮށްފަ އެވެ. ނަމަވެސް ކާމިޔާބެއް ނުލިބެ އެވެ. މަޖިލީސް އިންތިހާބުގައިވެސް އެންމެ ގޮނޑިއެއްވެސް ކާނިޔާބެއް ނުވެ އެވެ.

ކުރިއަށް އޮތް ކައުންސިލް އިންތިހާބަށް ކުރިމަތިލުމަށް މިދިޔަ އާދީއްތަ ދުވަހު ހުޅުވާލާފައިވާއިރު، އެޕްލިކޭޝަން ހުށަހެޅޭނީ ފެބްރުއަރީ 1 ވަނަ ދުވަހުގެ 3:30 ގެ ނިޔަލަށެވެ.