ހާލަތުގަ ޖެހުނު މީހުން މާފުއްޓަށް ދޫކޮށްލި ވާހަކަ އެމްޓީސީސީ ދޮގުކޮށްފި

އެމްޓީސީސީ ފެރީ ދޯންޏެއް ފަރަށް އެރުމުން އޭގައި ތިބި ޓޫރިސްޓުން މާފުއްޓަށް ގެނެސް ދޫކޮށްލި ކަމަށް ދެކެވޭ ވާހަކަ އެ ކުންފުނިން ދޮގުކޮށްފި އެވެ. 

އެމްޓީސީސީ އިން ވަނީ މި ހާދިސާ ހިންގައި ދިޔަގޮތާއި އެ ކުންފުނިން ކަންތައް ކުރި ގޮތް ކަމަށް ބުނާ ޓައިމްލައިންގެ މެސެޖުތަކެއް ހިއްސާކޮށްފަ އެވެ. އެ މެސެޖުގައި ބުނެފައިވާ ގޮތުން "ވ. ފެރީ ގެލެކްސީ" އިން މާފުއްޓަށް ބޭލި މީހުންނަށް ވާންވީ ގޮތް އެމްޓީސީީސީގެ މުވައްޒަފުން ވަނީ ކިޔައިދީ ގައިޑްކޮށްދީފަ އެވެ. 

"އެމްޓީސީސީ ސްޓާފުންނަށް ވާންވީ ގޮތް ގައިޑްކޮށްކޮށްދީ، ވާނުވާ އަންގަމުން ދިޔައީ، ބައެއް ގެސްޓުން ރަށު ތެރެއަށް އަރައިގެން ދިޔަ އެކަމު، އަޅާނުލާ ދޫކޮށްށެއް ނުލާ ގައިމު ވެސް،" އެ ކުންފުނިން ބުނެފައިވެ އެވެ. 

އެ ކުންފުނިން ބުނި ގޮތުގައި މި ފެރީގައި މާފުއްޓަށް ދިޔަ 31 މީހުންނާއި ވ. އަތޮޅަށް ދަތުރުކުރި 32 މީހުން ތިއްބި ކަމަށާ މީގެ ތެރެއިން 20 މީހުން ގެންދިޔައީ އާލިއާއިންނެވެ. އަދި ހަތަރު މީހުން އަމިއްލައަށް ދިޔަ ކަމަށާ އަށް މީހުން ވ. އަތޮޅަށް ޓްރާންސްފާ ކުރީ އެމްޓީސީސީ ލޯންޗުގަ އެވެ. 

"އެމީހުން އެދުނު ގޮތަށް ލަގެޖުވެސް ވަނީ ހަވާލުކޮށް ފައިނަލް ޑެސްޓިނޭޝަނަށް ގެންދެވިފަ،" އެ ކުންފުނިން ބުނެފައިވެ އެވެ.

އެމްޓީސީސީ އިން މިހެން ބުނި ނަމަވެސް މާފުށިން ވާހަކަ ދެއްކި އެކި ފަރާތްތަކުން ބުނި ގޮތުގައި ގެސްޓުންނަށް ލަގެޖު ހަވާލުކުރީ މިއަދު ހެނދުނު އެވެ. އަދި މާފުށީގެ ގެސްޓްހައުސްތަކުގައި ގިނަ އަދަދެއްގެ ގެސްޓުން އެމީހުން އަމިއްލައަށް ބޭތިއްބި އެވެ. އަދި މިއަދު ހެނދުނު ބައެއް ޓޫރިސްޓުން ވަނީ ތުލުސްދޫއަށް ފުރާފަ އެވެ.