އިރާނުގެ ހަމަނުޖެހުންތަކުގެ ފަހަތުގައި ބޭރުގެ އަތް ތަކެއް، މީހުން މަރަނީ ފައިސާ އަށް

އީރާނުގައި މިހާރު ހިނގަމުންދާ ހަމަނުޖެހުން ތަކަކީ އެމެރިކާ އާއި އިސްރާއީލު ގުޅިގެން ރާވާފައިވާ ކަމެއް ކަމަށާއި، މީހުން މަރާލުމަށާއި ތަންތަނުގައި ހުޅުޖެހުމަށް ބޭރުގެ ފަރާތްތަކުން ފައިސާ ދެމުންދާ ކަމަށް އީރާނުގެ ދިފާއީ ވަޒީރު އަޒީޒް ނާސިރުޒާދާ ތުހުމަތުކުރައްވައި ފިއެވެ.

ދައުލަތުގެ މީޑިއާއަށް ދެއްވި ބަސްދީގަތުމެއްގައި ނާސިރުޒާދާ ވިދާޅުވީ، ހަމަނުޖެހުންތަކުގައި ބައިވެރިވި މީހަކު 9 ބިލިއަން ރިއާލް (6,363 ޑޮލަރު) އާއެކު ހައްޔަރުކޮށްފައިވާ ކަމަށެވެ. އޭނާ ވިދާޅުވި ގޮތުގައި ބޭރުގެ ޖާސޫސީ އިދާރާ ތަކުން ވަނީ ހަމަނުޖެހުން ހިންގާ މީހުންނަށް ފައިސާ ދީފަ އެވެ. 

އިގްތިޞާދީ މާހިރުން ލަފާކުރާ ގޮތުގައި މި ފައިސާ ދިނުމަށް ބޭނުންކޮށްފައިވަނީ ކްރިޕްޓޯކަރަންސީ މެދުވެރިކޮށެވެ. ސަބަބަކީ އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ބޭންކިން ނިޒާމު ބޭނުންކުރުމަށް ހުރަސްތަކެއް ހުރުމެވެ.

ނާސިރުޒާދާ ވިދާޅުވީ މަރުވި މީހުންގެ %60 މީހުން މަރުވެފައިވަނީ ކައިރިން ބޮލަށް ދީފައިވާ ހަމަލާތަކުންނެވެ. އަދި ގިނަ ބަޔަކު މަރާލާފައިވަނީ ވަޅިންނާއި ނޭވާ ހާސްކޮށްލައިގެން ކަމަށް އޭނާ ފާހަގަކުރެއްވި އެވެ.

އޭނާ އިތުރަށް ތުހުމަތުކުރެއްވި ގޮތުގައި ހަމަނުޖެހުން ހިންގާ ގްރޫޕްތަކުގެ ލީޑަރުން ގަސްތުގައި އެ މީހުންގެ އަމިއްލަ މީހުން މަރާލަނީ އާންމުންގެ ޖަޒުބާތުތަކާ ކުޅުމަށެވެ.

މި ހަމަނުޖެހުންތައް ފެށުނީ މިދިޔަ ޑިސެމްބަރު 29 ގައެވެ. އެމެރިކާގެ ރައީސް ޑޮނަލްޑް ޓްރަމްޕް ދާދިފަހުން ވިދާޅުވެފައިވަނީ އީރާނުގައި މުޒާހަރާވެރިން މެރުން ހުއްޓާލާފައިވާ ކަމުގެ ޔަގީންކަން ލިބިފައިވާ ކަމަށެވެ.