ވީއައިއޭއިން ޑޮލަރު ފޭރުން: އިތުރު މީހަކު ހައްޔަރުކޮށްފި

މިދިޔަ އޮކްޓޯބަރު މަހު ވެލާނާ އިންޓަނޭޝަނަލް އެއާޕޯޓުން ބޭންކް އޮފް މޯލްޑިވްސް (ބީއެމްއެލް) ގެ ޑޮލަރު ބްރީފްކޭހެއް ފޭރުނު މައްސަލައިގައި އިތުރު މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފި އެވެ. 

މިދިޔަ އޮކްޓޯބަރު މަހުގެ 27 ވަނަ ދުވަހުގެ 4:50 ހާއިރު ވީއައިއޭގެ އާ ޓާމިނަލް އަށް ވަންނަ ދޮރުމަތިން މޫނު ފޮރުވައިގެން ތިބި ދެ މީހަކު ވަނީ ބޭންކުގެ ދެ މުވައްޒަފެއްގެ އަތުން ފައިސާ ހުރި ބްރީފްކޭސް ފޭރިގެންފަ އެވެ. ފޭރުނީ ވަޅިން ބިރުދެއްކުމަށްފަހު އެވެ.

ފޭރުމަށްފަހު ލޯންޗެއްގައި ފިލައިގެން އެ މީހުން ދިޔައީ މާލެ އަތޮޅު ހުރައަށެވެ. އަދި އެ މީހުން ފިލި ލޯންޗު ވެސް ވަނީ ހޯދާފަ އެވެ.

އޭގެފަހުން އެކި ފަހަރުމަތިން ފުލުހުން ވަނީ މީގެކުރިން ހަތް މީހަކު ހައްޔަރުކޮށްފަ އެވެ.

ފުލުހުން މިއަދު ބުނީ، އެ މައްސަލައިގައިި، މިދިޔަ އަންގާރަ ދުވަހު، މީޒާން / ރ.މަޑުއްވަރި، އިސްމާޢީލް ސިރްޙާން (30އ) ވަނީ ކޯޓު އަމުރެއްގެ ދަށުން ހައްޔަރު ހައްޔަރުކޮށްފައިވާ ކަމަށެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 30 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ.

މީގެކުރިން ހައްޔަރުކުރި މީހުން ވެސް ތިބީ ފުލުހުންގެ ބަންދުގަ އެވެ. 

ފޭރުނު ބްރީފްކޭހުގައި ހުރީ ފަސިންޖަރުންނަށް ބޭންކުން ދޫކުރާ ޑޮލަރެވެ. ބްރިފްކޭސް ތެރޭ ލައްކައަކަށް ވުރެ ގިނަ ޑޮލަރު ހުރި ކަމަށް މައުލޫމާތު ލިބެ އެވެ. ނަމަވެސް އެ ފައިސާ އަދިވެސް ހޯދިފައެއް ނުވެ އެވެ.