އަމިއްލަ 40 މީޑިއާއަކަށް 27 މިލިއަން ރުފިޔާ ދީފި

ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލުގެ ދަށުން 40 މީީޑިއާއަކަށް 27 މިލިއަން ރުފިޔާ ދޫކޮށްފި އެވެ.

މިއީ ރަޖިސްޓަރީކޮށްފައިވާ އަމިއްލަ ނޫސް މަޖައްލާތަކާއި ބްރޯޑްކާސްޓް ލައިސަންސް ލިބިފައިވާ އަމިއްލަ ބްރޯޑްކާސްޓަރުންނަށް ދައުލަތުގެ ބަޖެޓުންދޭ މާލީ އެހީއެކެވެ.

މާލީ އެހީ ހޯދަން ކުރިމަތިލި މީޑިއާތަކުގެ ތެރެއިން 41 މީޑިއާއަކުން އިޖުރާއަތްތައް ފުރިހަމަކޮށްފައިވާތީ، ޝަރުތު ހަމަވާ ކަމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ކުރިން ވަނީ ބުނެފަ އެވެ.

އޭގެ ފަހުން، އެއް ކުންފުންޏަކުން ހިންގާ ދެ މީޑިއާއެއް އޮތުމުން، އެ ކަންބަލައި، ލިސްޓުން މީޑިއާއެއް ވަނީ އުނިކޮށްފަ އެވެ. އެހެންވެ، ދައުލަތުގެ ބަޖެޓުން މާލީ އެހީ ލިބޭނެ ކަމަށް ކަނޑައެޅީ 40 މީޑިއާއަކަށެވެ.

ޔޫތު މިނިސްޓްރީން މިއަދު ބުނީ، އެ މީޑިއާތަކަށް ރުފިޔާ ފިނޭންސް މިނިސްޓްރީ މެދުވެރިކޮށް 27.29 މިލިއަން ރުފިޔާ މިހާރު ޖަމާކޮށްދީފައިވާ ކަމަށެވެ.

މި އެހީ ދިނުމުގެ އުސޫލު ފުރަތަމަ އެކުލަވާލިއިރު، އެހީ ދިނުމުގެ މައި ޝަރުތަކީ ރަޖިސްޓަރީ ކޮށްގެން ހިންގާތާ ތިން އަހަރު ވެފައިވުން ލާޒިމެވެ. އަދި ފައިސާ ދޭނެ އަދަދު ކަނޑައެޅުމުގައި މީޑިއާތަކުގެ މުވައްޒަފުންގެ އަދަދަށް ރިއާޔަތް ކުރުމަށް ހިމަނާފައިނުވާތީ، އޭރު މާލީ އެހީއަށް ޝަރުތު ހަމަވީ އެންމެ 18 މީޑިއާ އެވެ.

އެއާ އެކު ގިނަ މީޑިއާތަކެއްގެ ޝަކުވާ ބޮޑުވެ، އެހީ ދިނުން މަޑުޖައްސާލައި، މީޑިއާތަކުގެ މަޝްވަރާގެ މަތިން އާ އުސޫލެއް ވަނީ އެކުލަވާލާފަ އެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން އެކުލަވައިލި އާ އުސޫލުގައި ހިމެނި މައިގަނޑު ބަދަލަކީ ރަޖިސްޓްރީކޮށްގެން ހިންގާތާ އެއް އަހަރުވެފައިވާ މީޑިއާތަކަށް ވެސް މާލީ އެހީ ލިބުމެވެ. މީގެއިތުރުން، މާކްސް ދިނުމުގައި ބަލާފައި ވަނީ މީޑިއާގެ މުއްދަތާއި މުވައްޒަފުންގެ އަދަދާއި މީޑިއާ ނުވަތަ މީޑިއާ ހައުސްގެ ކުރިއެރުމަށް ހުށަހަޅާ ކަންކަން ނުވަތަ ބިޒްނަސް ޕްރޮފައިލާއި ކޮންޓެންޓުގެ ބާވަތާއި މުވައްޒަފުންގެ ތައުލީމީ ފެންވަރާއި ތަޖުރިބާ އަދި އިދާރީ އިންތިޒާމުތަކަށް ބެލުން ހިމެނެ އެވެ.

އުސޫލުގެ ދަށުން އެހީއަށް އެދުމުގެ ފުރުސަތު ހުޅުވައިލުމުން 57 މެންބަރުން އެހީއަށް އެދި ހުށަހެޅި ނަމަވެސް ޝަރުތު ހަމަވީ 41 މީޑިއާ އެވެ.