މުވައްޒަފުންގެ ޕެންޝަން ޖަމާނުކުރެވެނީ ހިދުމަތަށް ފައިސާ ނުލިބޭތީ: ވެމްކޯ

ވެމްކޯ މުވައްޒަފުންގެ ރިޓަޔަމެންޓް ޕެންޝަނަށް ގަވާއިދުން ފައިސާ ޖަމާނުކުރެވެނީ ހިދުމަތް ހޯދާ އެކިއެކި ފަރާތްތަކުން ފައިސާ ނުދައްކާތީ ކަމަށް އެ ކުންފުނިން ބުނެފި އެވެ.

ވެމްކޯއިން ރޭ ނެރުނު ބަޔާނެއްގައި ބުނީ ކުންފުނީގެ މުވައްޒަފުންގެ މުސާރައާއި އިނާޔަތް ދެނީ އެ ކުންފުންޏަށް އާމްދަނީގެ ގޮތުގައި ލިބޭ ފައިސާގެ އިތުރުން ސަރުކާރުގެ ސަބްސިޑީގެ ގޮތުގައި ލިބޭ މާލީ އެހީތެރިކަމާ އެކުގައި ކަމަށެވެ.

ނަމަވެސް ހިދުމަތް ހޯދުމަށްފަހު އެކި ފަރާތްތަކުން ފައިސާ ނުދީ ހުރިކަން އެ ބަޔާނުގައި ފާހަގަކޮށްފައިވެ އެވެ.

އޭގެތެރޭގައި މާލެ ސިޓީ ކައުންސިލުން ހޯދި ހިދުމަތަށް ދައްކަން ޖެހޭ 98 މިލިއަން ރުފިޔާ އަދިވެސް ނުލިބޭކަމަށް ވެމްކޯއިން ބުންޏެވެ. އަދި އެ ފައިސާ ހޯދަން 2024 އަދި 2025 ގައި އެކިފަހަރު މަތިން ކައުންސިލާ ބައްދަލުކޮށް މަޝްވަރާކޮށްފައިވާ ކަމަށްވެސް ބުންޏެވެ.

"މި ކޯޕަރޭޝަންގެ ހިދުމަތް ފުރިހަމައަށް ދިނުމާއެކު، ދަތިކަމެއް ނެތި މުވައްޒަފުންގެ މުސާރައާއި އިނާޔަތްތައް ހަމަޔަށް ދިނުމުގައި މި ކޯޕަރޭޝަނަށް ލިބެން ޖެހޭ އާމްދަނީ ބަރާބަރަށް ލިބިލިބި ހުރިމަކީ މުހިންމު ކަމެއް،" ވެމްކޯގެ ބަޔާނުގައިވެ އެވެ.

ވެމްކޯއިން ބުނީ އެ ފައިސާ ހޯދައި ދިނުމުގައި ފިނޭންސް މިނިސްޓްރީން އެހީތެރިކަން ފޯރުކޮށްދެމުންދާ ކަމަށެވެ.

އަދި މުވައްޒަފުންގެ ޕެންޝަން ފައިސާ ޖަމާކުރުމަށް ހުރި ދަތިތަކާ ގުޅިގެން ޕެންޝަން އޮފީހާ ވެސް މަޝްވަރާތަކެއް ކުރަމުންދާ ކަމަށާއި، ދަތިތަކާއެކުވެސް އަވަހަށް މައްސަލަ ހައްލުކޮށް މުވައްޒަފުންނަށް ހައްގުވާ ޕެންޝަން ފައިސާ ހަމަޖައްސަމުންދާ ކަމަށްވެސް ބުންޏެވެ.

ޔޫޓިލީ ކުންފުނިތަކުގެ ތެރެއިން އެންމެ ބޮޑު އާމްދަނީއެއް ވަންނަ އެއް ކުންފުންޏަކީ ވެމްކޯ އެވެ. ނަމަވެސް ޕީސީބީގެ އެންމެ ފަހުގެ ހިސާބުތައް ދައްކާ ގޮތުގައި ވެމްކޯއަށް 2024 ވަނަ އަހަރު 138 މިލިއަން ރުފިޔާގެ ގެއްލުން ލިބިފައިވެ އެވެ.