ނަޝީދު ދެއްކެވި ވާހަކަތަކަށް އީރާނުގެ އެމްބަސީން ވަރުގަދަ ރައްދެއް!

އީރާނުގައި މިވަގުތު އާންމުން ނުކުމެ ކުރަމުންދާ މުޒާހަރާތަކުގައި، އެ ގައުމުގެ ސަރުކާރު ދިފާއު ކުރުމުގެ ބަދަލުގައި، ރައްޔިތުންގެ ހައްގުގައި ތެދުވަން، ކުރީގެ ރައީސް މުހައްމަދު ނަޝީދު ގޮވާލެއްވި ގޮވާލެއްވުމަށް، ރާއްޖެއަށް ކަނޑައަޅާފައި ހުންނަ އީރާނުގެ އެމްބަސީން ވަރުގަދަ ރައްދެއް ދީފި އެވެ. 

އީރާނާ ދެކޮޅަށް ހުޅަނގުގެ ބޮޑެތި ގައުމުތަކުން އަޅާފައިވާ ދަތިކުރުމުގެ ހަރުކަށި ފިޔަވަޅުތަކާ ގުޅިގެން އިގުތިސޯދު ވަނީ ވަރަށް ބޮޑަށް ހީނަރުވެފަ އެވެ.

އެކަމާ ގުޅިގެން ތަކެތީގެ އަގު އިންތިހާއަށް ބޮޑުވެ، އާންމުން ނުކުމެ މުޒާހަރާ ކުރަން ފެށީ މީގެ ހަފްތާއެއްހާ ދުވަސް ކުރިންނެވެ.

މުސްލިމުންގެ ބޮޑު އާބާދީއެއް އޮންނަ އީރާނުގައި، އިސްލާމީ ދުނިޔޭގެ އިތުރުން ބައިނަލްއަގުވާމީ މުޖުތަމައު އިން ތެދުވަންވީ، ނަޝީދު އެކްސްގައި ވިދާޅުވި ގޮތުގައި، އީރާނުގެ ސަރުކާރު ދިފާއުކުރުމުގެ ބަދަލުގައި އީރާނުގެ ރައްޔިތުންގެ ހައްގުގަ އެވެ.

ނަޝީދުގެ ޕޯސްޓަށް ކުރި ރިޕްލައި އެއްގައި، އީރާނުގެ އެމްބަސީން ބުނީ، މިދިޔަ ޖޫން މަހު ހިނގި 12 ދުވަހުގެ ހަނގުރާމައިގެ ތެރޭގައި، އިޒްރޭލުން އީރާނުގެ ސިޓީތަކަށާއި އާންމު ރައްޔިތުންނަށާއި އުމްރާނީ ވަސީލަތްތަކަށް އަމާޒުކޮށް ވަރުގަދަ އަސްކަރީ ހަމަލާތަކެއް ދިން ކަމަށެވެ.

މީގެ އިތުރުން އީރާނުގެ ރައްޔިތުންނަށް އަމާޒުކޮށް ރޭވުންތެރިކަމާ އެކު، މީހުން މެރުމުގެ ލާއިންސާނީ އަމަލުތައް ވެސް ވަނީ ހިންގާފައިވާ ކަމަށް ނަޝީދަށް ދިން ރައްދުގައި ބުންޏެވެ.

މިހާރު ކުރަމުންދާ މުޒާހަރާތަކުގެ ނަމުގައި، ކުޑަކުދިންނާއި އަންހެނުންނާއި ކުށެއް ނެތް އާންމު ރައްޔިތުން މޮސާޑާ ގުޅުން ހުރި ފަރާތްތަކުން ސިޓީތަކުގައި ހިންގި ޓެރަރިސްޓް އަމަލުތަކުގެ ޝިކާރައަކަށް ވެފައިވާ ކަމަށް އެމްބަސީން ބުންޏެވެ.

އެމްބަސީން ބުނި ގޮތުގައި، އެ ހަމަނުޖެހުންތަކުގައި މިސްކިތްތަކުގައި ހުޅުޖަހައި، ހޮސްޕިޓަލްތައް ސުންނާފަތިކޮށް، މަގުމަތީގަ އާއި މާރުކޭޓުތަކުގައި އުޅުނު އާންމު ރައްޔިތުންނަށް ވަނީ ހަމަލާދީފަ އެވެ. 

"މި ހާލަތުގައި، ތިޔަ ބޭފުޅާ [ނަޝީދު] ހުންނެވީ ކޮން ފަޅިއެއްގައި ހެއްޔެވެ؟،" އެ ޕޯސްޓުގައި ނަޝީދާ ސުވާލުކޮށްފައި ވެ އެވެ.