ނަޝީދު ގޮވާލެއްވީ، އީރާނުގެ ސަރުކާރު ދިފާއުނުކޮށް، ރައްޔިތުންގެ ހައްގުގައި ތެދުވަން

އީރާނުގައި މިވަގުތު އާންމުން ނުކުމެ ކުރަމުންދާ މުޒާހަރާތަކުގައި، އެ ގައުމުގެ ސަރުކާރު ދިފާއު ކުރުމުގެ ބަދަލުގައި، ރައްޔިތުންގެ ހައްގުގައި ތެދުވަން، ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.

އީރާނާ ދެކޮޅަށް ހުޅަނގުގެ ބޮޑެތި ގައުމުތަކުން އަޅާފައިވާ ދަތިކުރުމުގެ ހަރުކަށި ފިޔަވަޅުތަކާ ގުޅިގެން އިގުތިސޯދު ވަނީ ވަރަށް ބޮޑަށް ހީނަރުވެފަ އެވެ.

އެކަމާ ގުޅިގެން ތަކެތީގެ އަގު އިންތިހާއަށް ބޮޑުވެ، އާންމުން ނުކުމެ މުޒާހަރާ ކުރަން ފެށީ މީގެ ހަފްތާއެއްހާ ދުވަސް ކުރިންނެވެ. 

އެ މުޒާހަރާތައް މިހާރު އީރާނުގެ އެކި ސަރަހައްދުތަކަށް ފެތުރި، ސަލާމަތީ ބާރުތަކާ ވަރުގަދަ ކުރިމަތިލުންތައް ހިނގައި، އެތައް ބަޔަކު ވަނީ މަރުވެފަ އެވެ. 

ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، އީރާނުގެ ރައްޔިތުން ނުކުމެ އަޑުއުފުލަމުންދަނީ އަތްނުފޯރާ ވަރަށް އަގުތައް ބޮޑުވެ، ގިނަ ޒަމާންތަކެއް ވަންދެން ނިކަމެތިކަން މަތީ ތިބި ތިބުމާ ދެކޮޅަށް ކަމަށެވެ. 

މުސްލިމުންގެ ބޮޑު އާބާދީއެއް އޮންނަ އީރާނުގައި، އިސްލާމީ ދުނިޔޭގެ އިތުރުން ބައިނަލްއަގުވާމީ މުޖުތަމައު އިން ތެދުވަންވީ، ނަޝީދު ވިދާޅުވި ގޮތުގައި، އީރާނުގެ ސަރުކާރު ދިފާއުކުރުމުގެ ބަދަލުގައި އީރާނުގެ ރައްޔިތުންގެ ހައްގުގަ އެވެ.