މުދަލު ޒަކާތް | މިދިޔަ އަހަރު 107 މިލިއަން ރުފިޔާ
މުދަލު ޒަކާތުގެ ނިސޯބަށް އެންމެ ފަހުން ބަދަލު އައިސްފައި ވަނީ މިދިޔަ ޑިސެމްބަރު މަހުގެ 21ގަ އެވެ. ޒަކާތު ހައުސްއިން އާންމުކޮށްފައިވާ ގޮތުގައި މިހާރު މުދަލު ޒަކާތުގެ ނިސޯބަކީ 19،527.90 ރުފިޔާ އެވެ.
މުދަލު ޒަކާތުގެ ގޮތުގައި މިދިޔަ އަހަރު 107 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ހިސާބުތަކުން ދައްކައިފި އެވެ.
މީރާއިން އާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ އަހަރު މުދަލުގެ ޒަކާތުގެ ގޮތުގައި ލިބިފައިވާ 107 މިލިއަން ރުފިޔާއަކީ 2024 އަހަރާ އަޅާބަލާއިރު 4.8 ޕަސެންޓް އިތުރު އަދަދެކެވެ. އެގޮތުން 2024 ވަނަ އަހަރު މުދަލު ޒަކާތުގެ ގޮތުގައި ލިބިފައި ވަނީ 102 މިލިއަން ރުފިޔާ އެވެ.
މިދިޔަ އަހަރު މުދަލު ޒަކާތުގެ ގޮތުގައި އެންމެ ބޮޑު އަދަދެއް ބަލައިގެންފައި ވަނީ މާޗު މަހު އެވެ. އެއީ 23 މިލިއަން ރުފިޔާ އެވެ. ދެވަނައަށް އެންމެ ބޮޑު އަދަދެއް ބަލައިގަތް ޖުލައި މަހު، 12 މިލިއަން ރުފިޔާ ބަލައިގެންފައިވާ ކަމަށް ހިސާބުތަކުން ދައްކަ އެވެ.
މުދަލު ޒަކާތުގެ ނިސޯބަށް އެންމެ ފަހުން ބަދަލު އައިސްފައި ވަނީ މިދިޔަ ޑިސެމްބަރު މަހުގެ 21ގަ އެވެ. ޒަކާތު ހައުސްއިން އާންމުކޮށްފައިވާ ގޮތުގައި މިހާރު މުދަލު ޒަކާތުގެ ނިސޯބަކީ 19،527.90 ރުފިޔާ އެވެ.
މުދަލު ޒަކާތަކީ އެމީހެއްގެ މުދަލުގައި ނިސޯބު ހަމަވާތާ އަހަރެއް ފުރިފައިވާ ކޮންމެ މީހެއްގެ މައްޗަށް އޮތް ފަރުޟެކެވެ.
ރާއްޖޭގައި މުދަލު ޒަކާތުގެ ނިސޯބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަން ޖެހޭ ދިވެހި ފައިސާގެ މިންވަރު ބަދަލުވެ އެވެ.
މުދަލު ޒަކާތް ނެރެންޖެހޭނީ އެ އަދަދެއްގެ 40 ބައި ކުޅަ އެއްބައެވެ. އެއީ 2.5 ޕަސެންޓެވެ. ދެހާސް ސޯޅައިން ފެށިގެން މުދަލު ޒަކާތް ބަލައިގަންނަމުން އަންނަނީ މީރާ އިންނެވެ.
ކޮމެންޓް
Republic of Maldives