ވައި ނުސާފުވުމުން ވައިގެ ދަތުރުފަތުރުގައި އެސްވީއެފްއާރު އުސޫލަށް އަމަލުކުރަނީ

އިންޑިއާގެ އުތުރުން އަންނަ ނުސާފު ވައި ރާއްޖެ ސަރަހައްދަށް ޖަމާވެފައިވާތީ، ވައިގެ ދަތުރުފަތުރު ކުރުމުގައި ރައްކާތެރިކަމުގެ ހާއްސަ ފިޔަވަޅުތަކެއް އަޅައިފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފި އެވެ.

އެމްއޭސީއެލް އިން މިއަދު ނެރުނު ބަޔާނެއްގައި ބުނީ، ވައި ނުސާފުވެ ނުވަތަ ބޯކޮށް ވާރޭ ވެހުމުގެ ސަބަބުން ދުރު ފެންނަ މިންވަރު ދަށްވެއްޖެ ނަމަ ހަދާފައިވާ ގަވާއިދުތަކާ އެއްގޮތަށް މަތިންދާބޯޓު ދަތުރުކުރުމުގައި އިތުރު ރައްކާތެރިކަމުގެ ފިޔަވަޅު އެޅުމަކީ، އެ ކުންފުނީގެ މައްޗަށް ލާޒިކުރާ ކަމެއް ކަމަށެވެ.

އެގޮތުން އަޅާ އެއް ފިޔަވަޅަކީ ބަލައިގެން ދުއްވާ ގަވާއިދު ނުވަތަ ވިޝުއަލް ފްލައިޓް ރޫލްސް (ވީއެފްއާރު) ވަގުތީ ގޮތުން މަޑުޖައްސާލައި، އިތުރު އެހީތެރިކަން ލިބޭނެ ގޮތަކަށް ސްޕެޝަލް ވިޝުއަލް ފްލައިޓް ރޫލްސް(އެސްވީއެފްއާރު) އަށް ދަތުރުކުރަން އެންގުން ކަމަށް އެމްއޭސީއެލްއިން ބުންޏެވެ.

އެހެންކަމުން މި ދުވަސްވަރު ރާއްޖޭގެ ވައި ނުސާފުވުމުގެ ސަބަބުން ބައެއް ފަހަރު ވީއެފްއާރު ވަގުތީ ގޮތުން މަޑުޖައްސާލައި, އެސްވީއެފްއާރު ބޭނުން ކުރެވެމުންދާ ކަމަށްވެސް އެމްއޭސީއެލް އިން ބުންޏެވެ.

ރާއްޖެއަށް މިދުވަސްވަރަކީ ވަރަށް ބޮޑަށް ވައި ނުސާފު ވެފައިވާ ދުވަސްވަރެކެވެ. ބައެއް ފަހަރު ހިމާލަޔަން ސަރަހައްދުން ހިރަފުހާއި ދުން، ވަޔާއެކު ބޭ އޮފް ބެންގަލް ހުރަސްކޮށް ރާއްޖެއާ ހަމައަށް ފޯރުމުން ވެސް މިހެން ދިމާވެ އެވެ.

މޫސުމާ ބެހޭ އިދާރާ، މެޓް އޮފީހުން އަންދާޒާ ކުރާ ގޮތުގައި ކުރިއަށް އޮތް ދެތިން ދުވަހުވެސް ވައި ނުސާފުވާނެ އެވެ.