ތަރައްގީ ލަސްނުކުރަން، ކައުންސިލްތަކަށް ޕީއެންސީ ކެންޑިޑޭޓުން ހޮވަން އެދިވަޑައިގެންފި

ސަރުކާރާ ދެކޮޅު ފިކުރުގެ ބޭފުޅުން ލޯކަލް ކައުންސިލްތަކުގައި ތިއްބަވައިގެން ތަރައްގީގެ މަޝްރޫއުތަކަށް ލަސްތަކެއް ކުރިމަތިވުމުގެ މާޒީ ތަކުރާރުވިޔަނުދޭން، އަންނަ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީގެ ކެންޑިޑޭޓުން ހޮވައި ދިނުމަށް ރައީސް ޑރ. މުހައްމަދު މުއިއްޒު މިރޭ އެދިވަޑައިގެންފި އެވެ.

ސަރުކާރު ހިންގާ ޕީއެންސީގެ މައި އޮފީސް ހުޅުވުމަށް މިރޭ ބޭއްވި ރަސްމިއްޔާތު ޝަރަފުވެރިކޮށް ދެއްވައި ވާހަކަފުޅު ދައްކަވަމުން، ރައީސް ވިދާޅުވި ގޮތުގައި، އެ މަނިކުފާނުގެ ސަރުކާރުގެ އަމާޒަކީ ރާއްޖޭގެ އެކި ކަންކޮޅުތަކުގައި ބާރު ސްޕީޑުގައި ރައްޔިތުން ބޭނުންވާ ތަރައްގީ ގެނެސްދިނުމެވެ.

މިގޮތުން، ރާއްޖޭގެ އުތުރުން ދެކުނަށް ހުރިހާ ރަށެއްގައި ބޯހިޔާވަހިކަމާއި، ބަނދަރާއި ފެނާއި ނަރުދަމާ އަދި މަގު ހެދުން ފަދަ އުމްރާނީ ތަރައްގީގެ އެތައް މަޝްރޫއުތަކެއް ހިނގަމުންދާކަން އެ މަނިކުފާނު ފާހަގަކުރެއްވި އެވެ. 

ރައީސް ވިދާޅުވީ، ސަރުކާރު ޖަވާބުދާރީ ކުރުވުމުގެ ވިސްނުމުގައި ސަރުކާރާ ދެކޮޅު ފިކުރުގެ ކެންޑިޑޭޓުން ކައުންސިލްތަކަށް އިންތިހާބުކޮށްފިނަމަ، އެ މަޝްރޫއުތައް ބާރު ދުވެލީގައި ހިންގުމަށް ހުރަސްތަކެއް ނޫނީ ލަސްތަކެއް އަންނަ ކަމަށެވެ.

މިގޮތުން، މިހާރު ވެސް ބައެއް މަޝްރޫއުތައް ހިންގުމަށް ބޭނުންވާ ބިން ކަނޑައެޅުން ފަދަ އާދައިގެ ކަންކަމުގައި ވެސް ސަރުކާރާ ދެކޮޅު ކައުންސިލްތައް އޮންނަ ރަށްރަށުގައި ގިނަ ދަތިތަކާ ކުރިމަތިވާކަން މިސާލެއްގެ ގޮތުގައި އެ މަނިކުފާނު ފާހަގަކުރެއްވި އެވެ.

އެހެންކަމުން، ސަރުކާރާ އެއް ފިކުރެއްގައި، ސަރުކާރާ އެކު، ބާރު ދުވެލީގައި ތަރައްގީގެ މަޝްރޫއުތައް ކުރިއަށް ގެންދިޔުމަށް ސިޓީތަކާއި ރަށްރަށުގެ ކައުންސިލްތަކަށް ޕީއެންސީގެ ކެންޑިޑޭޓުން ހޮވައި ދިނުމަށް ރައްޔިތުންގެ ކިބައިން އެ މަނިކުފާނު ވަނީ އެދިވަޑައިގެންފަ އެވެ.

"އަޅުގަނޑު ރައްޔިތުންނަށްވީ ހުރިހާ ވައުދެއް ފުއްދުމުގައި، އެކަމުގައި ލޯކަލް ލެވެލްގައި، ރަށު ފެންވަރުގައި، ސިޓީ ފެންވަރުގައި ފުރިހަމަ އެއްބާރުލުން ދެއްވާނެ ބޭފުޅުން ހޮވައިދެއްވާށޭ،" އެ މަނިކުފާނު ވިދާޅުވި އެވެ.