"ސަރުކާރު ޖަވާބުދާރީ ކުރުވުމަކީ ކައުންސިލްތަކުގެ ޒިންމާއެއް ނޫން" | އެމްޑީޕީއަށް ރައީސްގެ ނުސީދާ ރައްދެއް!

ކައުންސިލުތަކަކީ ދައުލަތް ހިންގުމުގެ ފަށަލައެއް ކަމަށާއި، އިންތިހާބުކުރާ މޭޔަރުންނާއި ކައުންސިލަރުންގެ މައިގަނޑު މަސްއޫލިއްޔަތަކީ މުނިސިޕަލް ހިދުމަތްތައް ދިނުމުގައި ސަރުކާރާ އެކީގައި މަސައްކަތް ކުރުންކަމަށް ވިދާޅުވެ، އިދިކޮޅު އެމްޑީޕީއަށް ނުސީދާކޮށް ރައީސް ޑރ. މުހައްމަދު މުއިއްޒު މިރޭ ރައްދު ދެއްވައިފި އެވެ.

ސަރުކާރު ހިންގާ ޕީއެންސީގެ މައި އޮފީސް ހުޅުވުމަށް މިރޭ ބޭއްވި ރަސްމިއްޔާތު ޝަރަފުވެރިކޮށް ދެއްވައި ވާހަކަފުޅު ދައްކަވަމުން، ރައީސް ވަނީ ކައުންސިލް އިންތިހާބުގައި އެމްޑީޕީގެ ކެމްޕޭނުގައި ސަރުކާރު ޖަވާބުދާރީ ކުރުމުގެ ވާހަކައަށް ނުސީދާކޮށް ރައްދު ދެއްވައި، އެއީ ގޯސް ސިގްނަލެއްގެ ގޮތުގައި ސިފަކުރައްވައިފަ އެވެ. 

"ކައުންސިލްތަކަކީ ސަރުކާރު ޖަވާބުދާރީ ކުރުވާން އޮންނަ މުއައްސަސާއެއް ނޫން ގާނޫނީ ގޮތަކުން ވެސް. ސަރުކާރު ޖަވާބުދާރީ ކުރަން ކައުންސިލަށް މީހުން ހޮވަން ކެމްޕެއިން ކުރާ ކަމަށްވަންޏާ އެއީ ފުރަތަމަ ވެސް ނުބައި ސިގްނަލެއް،" އެ މަނިކުފާނު ވިދާޅުވި އެވެ.

މިރޭގެ ހަފްލާގައި ރައީސް ތަކުރާރުކޮށް ވިދާޅުވި ގޮތުގައި، އެ މަނިކުފާނުގެ ސަރުކާރުން އަމާޒަކީ ރާއްޖޭގެ އެކި ކަންކޮޅުތަކުގައި ބާރު ސްޕީޑުގައި ރައްޔިތުން ބޭނުންވާ ތަރައްގީ ގެނެސްދިނުމެވެ.

ނަމަވެސް، ސަރުކާރު ޖަވާބުދާރީ ކުރުވުމުގެ ވިސްނުމުގައި އިންތިހާބަށް ނުކުންނަ ކެންޑިޑޭޓުންގެ ސަބަބުން އެ މަސައްކަތަށް ހުރަސްތަކެއް ކުރިމަތިވާނެކަމަށް ރައީސް ވިދާޅުވި އެވެ.

އެހެންކަމުން، ސަރުކާރާ އެއް ފިކުރެއްގައި، ސަރުކާރާ އެކު، ބާރު ދުވެލީގައި ތަރައްގީގެ މަޝްރޫއުތައް ކުރިއަށް ގެންދިޔުމަށް ސިޓީތަކާއި ރަށްރަށުގެ ކައުންސިލްތަކަށް ޕީއެންސީގެ ކެންޑިޑޭޓުން ހޮވައި ދިނުމަށް ރައްޔިތުންގެ ކިބައިން އެ މަނިކުފާނު ވަނީ އެދިވަޑައިގެންފަ އެވެ.