ރަސްމާލެ | ސައިޓް އޭގެ 60 އަށް ވުރެ ގިނަ ހެކްޓަރުގެ ބިން ހިއްކައިފި

މި ސަރުކާރުގެ ބޯހިޔާވަހިކަމުގެ ބިޔަ މަޝްރޫއު، ރަސްމާލެ ބިން ހިއްކުމުގެ މަސައްކަތުގެ ތެރެއިން، ސައިޓް އޭގެ 60 އަށް ގިނަ ހެކްޓަރުގެ ބިން ހިއްކާ ނިމިފައިވާ ކަމަށް އެމްއޭސީއެލްއިން ބުނެފި އެވެ.

ރަސްމާލެ ހިއްކައި ނިންމުން އަވަސްކުރުމަށް ދުނިޔޭގެ އެންމެ ބޮޑެތި ޑްރެޖަރުތައް ގެނެސްގެން މަސައްކަތް ކުރަމުންދަނީ ޖުމްލަ 12 ސަރަހައްދަކަށް ބަހާލައިގެން 1،009 ހެކްޓަރުގެ ބިން ހިއްކުމަށެވެ.

މިގޮތުން، މިދިޔަ މަހުގެ އެއްވަނަ ދުވަހު ފެށި ސައިޓް އޭއިން ހިއްކަން ހަމަޖެހިފައިވާ 138 ހެކްޓަރުގެ ތެރެއިން، މިހާތަނަށް 64 ހެކްޓަރުގެ ބިން ހިއްކާ ނިމިފައިވާ ކަމަށް އެމްއޭސީއެލްއިން ބުންޏެވެ. 

އެމްއޭސީއެލްއާއި ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަނާއި، އިންޑިއާގެ މޯހަން މުތާއާއި، ޗައިނާ ހާބާ އިންޖިނިއަރިންގްއިން އަންނަނީ، ބިން ހިއްކުމުގެ މަސައްކަތް ކުރަމުންނެވެ. ސަރުކާރުގެ އަމާޒަކީ، އަންނަ މާޗް މަހުގެ ނިޔަލަށް ރަސްމާލެ ހިއްކުމުގެ މަސައްކަތް ނިންމުމެވެ.

ބިން ހިއްކައި ނިމުމާ އެކު، ރަސްމާލޭން 15،000 ގޯތި ދިނުމަށް، އެކުލަވާލާފައިވާ އާ އުސޫލުގެ ދަށުން، ގޯއްޗަށް ކުރިމަތިލުމުގެ ފުރުސަތު މި މަހު ހުޅުވާލާނެ އެވެ.