ރާއްޖޭގެ ޓެކްސް ދައްކާ ލިސްޓަށް އަލަށް 2,341 ފަރާތެއް

ޓެކުސް ދައްކާ ފަރާތްތަކުގެ އަދަދު އިތުރުވުމުގައި ދެ މާނައެއް ނެގިދާނެ އެވެ. އެއް ގޮތަކީ އިގްތިސާދީ ހަރަކާތްތައް އިތުރުވުމެވެ. އަލަށް ރަޖިސްޓްރީވާ ފަރާތްތައް ގިނަވުމަކީ ގައުމުގެ އިގްތިސާދީ ހަރަކާތްތައް ފުޅާވަމުންދާކަމުގެ ނިޝާނެކެވެ. މާނައަކީ އަލަށް ވިޔަފާރިތައް ފެށުމާއި ވަޒީފާ އަދާކުރާ މީހުންގެ އާމްދަނީ އިތުރުވެ ޓެކްސް ދައްކަންޖެހޭ މިންވަރަށް ފެތުމެވެ. އަނެއް މާނައަކީ ވިޔަފާރިތައް ގާނޫނީ އިމުގެ ތެރެއަށް ވަނުމެވެ. ގިނަ ބަޔަކު ރަޖިސްޓްރީވުމަކީ ޓެކްސް އިދާރާގެ ގާނޫނީ އިމުގެ ތެރެއަށް ވިޔަފާރިތައް ވަންނަމުންދާކަމުގެ ހެއްކެކެވެ. މި ދެ ގޮތުން މާނަކޮށް ތިލަފަލުން ކިރުވި ނަމަވެސް މޯލްޑިވްސް އިލެންޑް ރެވެނިއު އޮތޯރިޓީ (މީރާ) ގެ ހިސާބުތަކުން ފެންނަން އޮތީ އަލަށް ޓެކްސް ދައްކާ ލިސްޓަށް މިދިޔަ އަހަރުގެ ތިންވަނަ ކުއާޓަރާ ހަމައަށް 2,341 ފަރާތެއް ވަނީ ވަދެފަ އެވެ.

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ނެރުނު މިދިޔަ އަހަރުގެ ތިންވަނަ ކުއާޓަރުގެ ރިޕޯޓް ދައްކާ ގޮތުން އެ ކުއާޓަރުގައި އަލަށް 2,341 ފަރާތެއް ޓެކްސް ދައްކަން ރަޖިސްޓްރީވެފައިވެ އެވެ. 

ކުއާޓަލީ ރިޕޯޓް ދައްކާ ގޮތުން އެންމެ ގިނަ ފަރާތްތަކެއް އަލަށް ރަޖިސްޓްރީވެފައިވަނީ އިންކަމް ޓެކްސްގަ އެވެ. އަދި މިދިޔަ ޓެކްސް ދައްކަން ރަޖިސްޓްރީވި މީހުންގެ އަދަދު ވަނީ 2024 ވަނަ ތިންވަނަ ކުއާޓަރާ އަޅާބަލާއިރު މިދިޔަ އަހަރު  %28.6 އިތުރުވެފަ އެވެ. ޓެކްސް ދައްކަން 2024 ގައި އަލަށް ރަޖިސްޓްރީވެގައިވަނީ 1,820 ފަރާތެކެވެ. 

ޓެކްސް ދައްކަން އަލަށް ރަޖިސްޓްރީވި ވަކިވަކި ދާއިރާތައް ބަލާއިރު އަމިއްލަ 1,291 ފަރުދުން ވަނީ ޓެކްސް ދައްކަން ރަޖިސްޓްރީވެ އެވެ. އަދި 707 ކުންފުނި ރަޖިސްޓްރީވިއިރު، ޕާޓްނާޝިޕްގެ ގޮތުގައި 187 ފަރާތެއް ހިމެނެ އެވެ. އަދި އެހެނިހެން 156 ފަރާތެއް ވެސް ހިމެނެ އެވެ.