އޮންލައިންކޮށް ޖުވާ ކުޅުންވެސް ޖިނާއީ ކުށަކަށް ހަދާއިރު، މާނަކުރުމާމެދު ކަންބޮޑުވުން

ޖުވާ ކުޅުމާއި ޖުވާ ތަނެއް ހިންގުމަކީ ޖިނާއީ ކުށަކަށް ހެދުމަށް ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅި ބިލުގައި ޖުވާ ކުޅުން މާނަކޮށްފައިވާ ގޮތާމެދު ކަންބޮޑުވުންފާޅުކޮށްފި އެވެ. 

ސަރުކާރުގެ ފަރާތުން ހިތަދޫ މެދުދާއިރާގެ މެންބަރު އަހުމަދު އަޒާން ގާނޫނުލްއުގޫބާތަށް ހުށަހެޅި އިސްލާހުގައި ޖުވާކުޅުމާއި އެފަދަ ތަނެއް ހިންގުމަކީ ކުށަކަށް ހެދުމަށް މާއްދާއެއް ހިމަނާފައިވާއިރު، އެއް އަހަރާއި ހަތް މަސް އަދި ހަ ދުވަހުގެ ޖަލު ހުކުމެއްގެ ގޮތުގައި ވަނީ ދަރަޖަކޮށްފަ އެވެ.

ހަތަރު އަހަރާ ހަމައަށް ބޮޑު އަދަބެއް ކަނޑައެޅޭއިރު، އެންމެ ކުޑަ އަދަބަކީ ހަތަރު މަހާއި 24 ދުވަހުގެ ޖަލު ހުކުމެވެ. 

ދައުރުން ބޭރުގައި މަޖިލީހުގެ ޖަލްސާއެއް ބާއްވައިގެން، އެ ބިލުގެ އިބްތިދާއީ ބަހުސްގައި، ހުޅުމާލެ ދެކުނު ދާއިރާގެ އެމްޑީޕީ މެމްބަރު ޑރ. އަހުމަދު ޝަމްހީދު ވަނީ، ޖުވާ ކުޅުން މާނަކޮށްފައިވާ ގޮތް ސާފުކޮށް ބަޔާންކޮށްފައިނުވާތީ އެކަމާ މެދު ކަންބޮޑުވުންފާޅު ކުރައްވައިފަ އެވެ. 

ބިލުގައި ބުނެފައިވާ ގޮތުން، ޖުވާކުޅުމަކީ ވަކި މުބާރާތެއްގައި ނުވަތަ ކުޅިވަރެއްގައި ނުވަތަ ވަކި ސްކީމެއްގައި އިލެކްޓްރޯނިކްކޮށް ނުވަތަ ޖުވާކުޅުމުގެ އާލާތެއް މެދުވެރިކޮށް ނުވަތަ ހިނގަމުންދާ ނުވަތަ ކުރިއަށް އޮތް ތަނުގައި ހިނގާނެ ވަކި ކަމެއްގެ މައްޗަށް ބިނާކޮށް، އެކަމުން ނުކުންނާނެ ކަނޑައެޅޭ ވަކި ނަތީޖާއެއް ލިބިގަތުމުގެ މުގާބިލުގައި މީހަކު އަގެއް ހުރި އެއްޗެއް ދޫކޮށްލުމެވެ. 

ޝަމްހީދު ވިދާޅުވި ގޮތުގައި، ފޮރެކްސް އާއި ސްޓޮކް މާކެޓުގައި ވެސް ގިނަ ދިވެހިން އިންވެސްޓުކުރަމުންދާއިރު، އެއީ ވެސް ގެއްލުން ލިބޭނެ ފުރުސަތު އޮތް ކަމެއް ކަމުން، ބިލުގައި މިހާރު ޖުވާ ކުޅުން މާނަކޮށްފައިވާ ގޮތަށް ފެތޭ ކަމަށެވެ.

މިގޮތުން، އެހެން އެކި ކަންކަމުގައި ކުރެވޭ އިންވެސްޓުމަންޓުތަކަކީ ވެސް އެ މާނައަށް ފެތުމުގެ ޖާގަ އޮތް ކަންކަން ކަމަށް ޝަމްހީދު ވިދާޅުވި އެވެ.

އެހެންކަމުން، ބިލުގައި ޖުވާ ކުޅުން މާނަކޮށްފައިވާ ގޮތް އިތުރަށް ތަފްސީލް ކުރުން، ނުވަތަ ހިއްސާގެ ބާޒާރާއި ފޮރެކްސް ފަދަ ކަންކަން ވަކިން ބަޔާންކުރުމަށް އޭނާ ގޮވާލެއްވި އެވެ.

އަޒާން ހުށަހެޅުއްވި އެ ބިލުގެ އިބްތިދާއީ ބަހުސް މިހާރު ނިންމާލާފައިވާއިރު، މިއަދުގެ ވޯޓު ގަޑީގައި އެ ބިލު މަޖިލީހަށް ބަލައިގަތުމާމެދު ވޯޓަށް އަހާނެކަމަށް މަޖިލީހުގެ ރިޔާސަތުން ވަނީ އިއުލާނުކޮށްފަ އެވެ.