ދެކުނަށް ގަދަވަޔާއެކު ވިއްސާރަ، އައްޑޫ ބައެއް ގެތަކުގެ ފުރާޅު ވެސް އެއްލާލައިފި

ރާއްޖޭގެ ދެކުނުގެ އަތޮޅުތަކަށް ގަދަ ވަޔާއެކު ވިއްސާރަ ކުރާނެ ކަމަށް ލަފާކޮށް ހުދު ސަމާލު ނެރެފި އެވެ.

ތ. އަތޮޅުން ފެށިގެން އައްޑޫ ސިޓީއަށް ނެރެފައިވާ އެ ސަމާލުގައި ބުނެފައި ވަނީ އެ ސަރަހައްދަށް ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކުރެވޭ ކަމަށެވެ.

އެ ސަރަހައްދަށް މިހާރު ކުރަމުންދާ ވިއްސާރައިގައި އައްޑޫ ސިޓީގެ ބައެއް ގެތަކުގެ ފުރާޅު، ވަޔާ އެއްލާލުމާ ގުޅިގެން ސިފައިން ދަނީ އެހީތެރިކަން ފޯރުކޮށްދެމުންނެވެ.

އެގޮތުން ވިއްސާރައާ އެކު އެރި ކޮޅިގަނޑުގައި މިހާތަނަށް ހަތަރު ގެއެއްގެ ފުރާޅު ވަޔާ އެއްލާލާފައިވެ އެވެ. އެގޮތުން ރޭ 23:20 ހާއިރު ހިތަދޫގެ ގެއެއްގެ ފުރާޅު ވަނީ އެއްލާލާފަ އެވެ. އަދި މިއަދު ހެނދުނު ހިތަދޫ އެހެން ގެއަކާއި މަރަދޫ ގެއަކާއި މީދޫ ގެއެއްގެ ފުރާޅު އެއްލާލުމުން ސިފައިން ވަނީ އެހީތެރިކަން ފޯރުކޮށްދީފަ އެވެ.

ސިފައިންގެއިން ބުނީ މި ހާދިސާތަކުގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.