ގާނޫނާއެކު ގޭންގު ކުށްތައް މަދުވެއްޖެ: ފުލުހުން
މި ގާނޫނަށް އަމަލުކުރާން ފެށި ފަހުން ގޭންގު ކުށްތަކާ ގުޅޭ ހަތް މައްސަލައެއްގައި 11 މީހަކު މިހާތަނަށް ވަނީ ހައްޔަރުކޮށްފަ އެވެ. އަދި މިވަގުތު ފުލުހުންގެ ބަންދުގައި ތިބީ 2 މީހުންނެވެ.
ގޭންގު ކުށްތައް ހުއްޓުވުމުގެ ގާނޫނު ތަންފީޒުކުރަން ފެށިފަހުން، ގޭންގުތަކުން ކުރާ ކުށްތައް މަދުވެފައިވާކަމަށް ފުލުހުން ބުނެފި އެވެ.
އޮގަސްޓް 25، 2025 ގައި އަމަލުކުރަން ފެށި އެ ގާނޫނުގެ ދަށުން އިންތިޒާމުވެގެން ކުށްކުރާ ގްރޫޕެއް އުފެއްދުމާއި ހިންގުމަކީ ކުށެއްކެވެ. އަދި އެފަދަ ކުށްކުރާ މީހުންނާއި އެކަމުގައި ބައިވެރިވާ މީހުންނަށް ހަރުކަށި އަދަބުތަކެއް ކަނޑައަޅާފައިވެ އެވެ. އެފަދަ ކުށްތައް ހުއްޓުވުމަށް ކަމާބެހޭ އިދާރާތަކަށް ބޮޑެތި ބާރުތަކެއް ވެސް ވަނީ ދީފަ އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ގޭންގު ކްރައިމް އެންފޯސްމަންޓުގެ ހެޑް، ސްޕްރިޓެންޑެންޓް އޮފް ޕޮލިސް އިސްހާގު އާދަމް ވިދާޅުވީ ގޭންގު ކުށްތަކާ ބެހޭ ގާނޫނު ތަންފީޒު ކުރަން ފެށުމާއެކު ފުލުހުން ހުއްޓުމެއްނެތި މަސައްކަތްތަކެއް ކުރަމުންދާ ކަމަށެވެ. އެއްކަމަކީ ކުށްކުރާ ގްރޫޕްތައް ޖަމާވާ ތަންތަން ބަލައިފާސްކޮށް، އެމީހުން އެތަންތަނުން ފޮނުވައިލުމުގެ މަސައްކަތް ކުރަމެވެ.
އަނެއް ކަމަކީ ފުލުހުންގެ އިންޓެލިޖެންސަށް ލިބޭ މައުލޫމާތުތަކުގެ އެހީގައި ގޭންގުތަކުގެ ސޭފްހައުސްތައް ހޯދައި، ކޯޓު އަމުރުގެ ދަށުން ބަލައިފާސްކުރުން ކަމަށް އިސްހާގު ވިދާޅުވި އެވެ.
"އޮގަސްޓް 25 ވަނަ ދުވަހުން ފެށިގެން ފާހަގަކުރެވޭ އެއްކަމަކީ ގޭންގު ކުށްތައް މަދުވެފައިވާކަން،" އޭނާ ވިދާޅުވި އެވެ.
މި ގާނޫނަށް އަމަލުކުރާން ފެށި ފަހުން ގޭންގު ކުށްތަކާ ގުޅޭ ހަތް މައްސަލައެއްގައި 11 މީހަކު މިހާތަނަށް ވަނީ ހައްޔަރުކޮށްފަ އެވެ. އަދި މިވަގުތު ފުލުހުންގެ ބަންދުގައި ދެ މީހަކު ތިބިއިރު، ގޭންގުތަކުން ޖަމާވާ ހަ ތަނެއް ރެއިޑްކޮށްފައިވާ ކަމަށް އިސްހާގު ވިދާޅުވި އެވެ.
ފުލުހުން ވަނީ މިއަހަރުގެ ފުރަތަމަ ދުވަހުން ފެށިގެން މިމަހުގެ 20 ވަނަ ދުވަހާ ހަމައަށް ގޭންގު ކުށްތަކާ ގުޅޭ ތަފާސްހިސާބުތައް އާންމުކޮށްފަ އެވެ.
- އެކި އޮޕަރޭޝަންތަކުގައި 17،483 ފަހަރު ސުވާލުކުރި
- ގޭންގުތައް ޖަމާވާ އެކި ތަންތަން 75،441 ފަހަރު ބަލައިފާސްކުރި
- 170 ތަނެއްގައި ހުރި ގްރެފިޓީތައް ނައްތައިލި
- ކޯޓު އަމުރެއްގެ ދަށުން 10 ތަނެއް ރެއިޑްކުރި
- ކުށްކުރާ މީހުންގެ 341 އުޅަނދު ޓޯކުރި
އޭގެ އިތުރުން، ފުލުހުން ހާމަކުރި ގޮތުގައި، ގޭންގުތަކާއެކު ފެންނަ ކުޑަކުދިންނާ 2679 ފަހަރު ސުވާލުކޮށްފައިވެ އެވެ.
ގޭންގުތައް ޖަމާވާ ހޮޓްސްޕޮޓްތަކުގައި ކުޑަކުދިން ފެންނަ މިންވަރު އިތުރުވަމުންދާކަން ފާހަގަކުރައްވައި އިސްހާގު ވިދާޅުވީ އެކުދިން އުޅޭ ނޫޅޭ ގޮތް ބެލުމަކީ ބެލެނިވެރިންގެ ޒިންމާއެއް ކަމަށެވެ.
"އެކުދިން ދަންވަރު ވަގުތުގައިވެސް އަދި ދުވާލުވެސް އުޅޭ ނޫޅޭ ގޮތް ބަލަން ބެލެނިވެރިން ޖެހޭނެ. ދަރިން ހާއްސަކޮށް ރޭގަނޑު ގިނަވަގުތު މި ހޭދަކުރަނީ ކާކާއެކީތޯ، އެކުދިން ކުރަނީ ކީއްތޯކުރަނީ ބަލަންޖެހޭނެ. އެހެންނޫނީ ހިތާމަވެރި ހާދިސާއެއް ކުރިމަތިވެދާނެ،" އޭނާ ވިދާޅުވި އެވެ.
މީގެ ކުރިން ކޮމިޝަނާ އޮފް ޕޮލިސް އިސްމާއިލް ނަވީން ވިދާޅުވެފައި ވަނީ ގޭންގުތަކުން ގިނައިން ފެންނަނީ އުމުރުން 17 އަހަރާއި ކިރިޔާ 18 އަހަރުވެފައިވާ ކުދިން ކަމަށެވެ. އެފަދަ 300 ކުދިން ފާހަގަކުރެވި، އެކުދިންނަށް އެކިއެކި ޕްރޮގްރާމްތައް ހިންގަމުންދާ ކަމަށް ވިދާޅުވި އެވެ.
ކޮމެންޓް
Republic of Maldives