ޕީއެންސީގެ ޕްރައިމަރީގެ ވޯޓުލުން ފަށައިފި

ކުރިއަށް އޮތް ލޯކަލް ކައުންސިލުތަކާއި އަންްހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި، ވެރިކަންކުރާ ޕީޕަލްސް ނޭޝަނަލް ކޮންގުރެސް ޕާޓީ (ޕީއެންސީ)ގެ ޓިކެޓުގައި ވާދަކުރާނެ ފަރާތްތައް ކަނޑައެޅުމަށް ޕްރައިމަރީގެ ވޯޓުލުން ފަށައިފި އެވެ.

ޕްރައިމަރީގެ ވޯޓުލުން މިއަދު ފަށާފައި ވަނީ ހެނދުނު 9:00 ގައެވެ. ހަވީރު 16:00 އާ ހަމައަށް ވޯޓުލުން ކުރިއަށް ދާނެ އެވެ.

ޕީއެންސީގެ ޓިކެޓުގައި ކައުންސިލް އިންތިހާބުގައި ވާދަކުރަން ހުޅުވައިލުމުން 97 ޕަސެންޓް ގޮނޑިއަށް ވަނީ ޕްރައިމަރީއާ ނުލައި ކެނޑިޑޭޓުން ލިބިފަ އެވެ. ޕްރައިމަރީ ބާއްވަނީ އެއް ގޮނޑިއަށް އިންތިހާބު ކުރާ އަދަދަށްވުރެ ގިނަ މީހުން ކުރިމަތިލާފައިވާ ދާއިރާތަކުގަ އެވެ.

ޕީއެންސީން މީގެ ކުރިން ނެރެފައިވާ ލިސްޓުގައި، އެ ޕާޓީން 94 ދާއިރާއަކުން 308 ކެންޑިޑޭޓުން ޕްރައިމަރީގައި ވާދަކުރެ އެވެ. އޭގެތެރެއިން 183 ކެންޑިޑޭޓުން ވާދަކުރަނީ ކައުންސިލަށެވެ. އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް 121 މީހަކު ވާދަކުރެ އެވެ. 

މޭޔަރު ކަމުގެ ޕްރައިމަރީ ބާއްވަނީ ހަމައެކަނި އައްޑޫ ސިޓީގަ އެވެ. އެހެން ސިޓީތަކަށް ކުރިމަތިލާފައި ވަނީ އެންމެ ކެނޑިޑޭޓެކެވެ.